Өткен аптада аудан әкімі Айдар Ибраевтың төрағалығымен Бородулиха аудандық әкімдігінің кезекті отырысы өтті. Күн тәртібінде жастар саясатын іске асыру, ықтимал су тасқынына дайындық барысы, бірқатар елді мекендерінің бас жоспарларын әзірлеу мәселелері қаралды.
Алғашқы сауал бойынша ішкі саясат бөлімінің басшысының м.а. Анар Оразалина баяндама жасады. Ауданда 14-35 жас аралығындағы 9065 жас бар. Олардың білім алып, еңбек етулеріне мейлінше жағдай жасалған. Дегенмен, NEET санатындағы жастар да жоқ емес. Өткен жылдың соңындағы мәліметтерге сүйенсек, 235 адам осы санатта. Жұмыссыздар санын азайту мақсатында мемлекеттік бағдарламаларды түсіндіру бойынша ақпараттық іс-шаралар, бос орындар жәрмеңкелері тұрақты түрде өткізіліп тұрады.
— Мансап орталығының мәліметінше, мемлекеттік қолдау бағдарламаларына қатысуға 461 жас өтініш білдірген. Оның ішінде 412 адам жұмысқа орналастырылды. Сонымен бірге, былтыр халықтың әлеуметтік осал санаттарынан 12 адам 400 АЕК көлемінде мемлекеттік грант, 20 адам 2,5 пайызбен 2021-2025 жылдарға арналған «Кәсіпкерлікті дамыту» ұлттық жобасы аясында шағын несие алды. Экономика және бюджеттік жоспарлау бөлімінің мәліметінше, «Дипломмен ауылға» бағдарламасы аясында өткен жылы 50 маманға 17 млн 250 мың теңге көтерме жәрдемақы, 13 маманға жалпы сомасы 67 млн 177 мың теңге несие берілді. Ауданда жаз маусымында «Жасыл ел» бағдарламасы да да жүйелі түрде жүзеге асады. Өткен маусымда жасақ құрамында еңбек еткен 70 жас Новая Шульба, Новопокровка, Жезкент және Бородулиха елдімекендерін абаттандырумен айналысты,- деген Анар Қайратқызы жастар арасындағы волонтерлік қызмет, жастар арасында ұйымдастырылған тәрбиелік маңызы зор шаралар жайлы да айтты.
Биыл мемлекеттік жастар саясатын жүзеге асыру жастар ұйымдарын дамыту, Бородулиха ауданының жастар ресурстық орталығының әлеуетін арттыру, тәуелділіктің алдын алу, отбасымен жұмыс сынды бағыттар бойынша жүзеге аспақ.
Күн тақырыбындағы кезекті сауал, Бородулиха ауданының елдімекендерінің бас жоспарын әзірлеу барысы туралы Бородулиха ауданының сәулет, қала құрылысы және құрылыс бөлімі басшысының міндетін атқарушы Мәдениет Нұрлыбеков баяндады.
Бородулиха ауданындағы 49 елдімекеннің төртеуінің, Бородулиха, село Новая Шульба, Новопокровка и село Михайличенково ауылдарының ғана бас жоспары бар. Өткен жылы жалпы сомасы 27010 мың теңгеге Переменовка, Петропавловка, Дмитриевка, Камышенка, Ауыл, Коростели, Бел-Ағаш, Песчанка ауылдарын дамыту және құрылыс жоспары әзірленген. Сондай-ақ, 2023 жылы Бородулиха ауданының сәулет, қала құрылысы және құрылыс бөлімі 2024 жылы Барышовка, Боровлянка, Боровое, Жезкент, Жерновка, Зенковка, Знаменка, Ивановка, Красный Яр, Поднебесное, Подхоз Березовка, Успенка, Орловка, Андроновка, Шелехово ауылдарының даму және құрылыс жоспарларын, Бородулиха ауылындағы егжей-тегжейлі жоспарлау жобасын әзірлеу үшін облыс қазынасынан қаражат бөлуге бюджеттік өтінім жасаған. Берілген бюджеттік өтінімдерге сәйкес, жоғарыда аталған елді мекендерді дамыту жобасын әзірлеуге облыстық бюджеттен 181 104 мың теңге көлемінде қаржы бөлінді. Бүгінде бас жоспарларды әзірлеу бойынша жұмыстарды сатып алуға конкурстар жарияланған.
Әйгерім СӘРСЕНҚАЛИ,
«Жаңа уақыт» 
