1992 жылы қазанда Қазақстанның сол кездегі астанасы Алматы қаласында рухани келісімнің 1-ші әлемдік конгресі өтті. Конгреске қатысушылар қазанның 18-ін Рухани келісім күні – қақтығыстар мен жанжалдарға тоқтам салу күні, татулық іздеу күні, жақынға қайырымдылық және көмек күні деп жариялау туралы манифест қабылдады.
1992 жылдан бастап бұл күн Қазақстанда атаулы күн ретінде атап өтіледі. Рухани келісім күнін мерекелеу мақсатында Бородулиха ауданында кешенді іс-шаралар өткізілді.
Осы орайда, аудан имамы Әріпжан Қожанұлы: «Рухани келісім күні аясында облысымызда дәстүрлі дін басшыларының қатысуымен өткен игілікті іс-шара жыл сайын ұйымдастырылады және бұл облыстағы дінаралық келісімінің тағы бір көрінісі саналады. Біз өз тарапымыздан әлеуметтік аз қамтылған топтар мен жастарымыздың діни иммунитетін көтеруіміз керек. Өйткені, азаматтар басқа ағымдардың қатарына кетіп қалмауы тиіс. Бүгінде барлық дін өкілдері достықта, бір бағытта өмір сүріп келеді. Өйткені, ұлт пен ұлыстың татулығы еліміз үшін маңызды болса, бұл орайда, біздің жұмысымыздың да маңыздылығы орасан. Рухани ізгіліктерді қадір тұтқан біздің елде өзара келісімнің негізі қалыптасқан десек те болады. Бірақ, бізді алаңдататын бір мәселе бар. Ол – жастардың діни сауаттылығы. Енді аудандық ішкі саясат бөлімі осы бағытта талай игі істі қолға алып отыр», – деді.
18 қазан күні Бородулиха ауданының Достық үйінде «Рухани келісім – бірліктің негізі» тақырыбында дөңгелек үстел өтті. Дөңгелек үстел жұмысына аудандық ішкі саясат бөлімінің басшысы, жастар орталығының мамандары, имам, Бородулиха колледжінің студенттері мен Абай атындағы орта мектептің оқушылары қатысты.
Дөңгелек үстелге жиналғандар дін мәселелерін, мемлекеттегі, облыс және аудандағы халықаралық тұрақтылықты, халыққа және жастарға дін туралы ақпаратты дұрыс жеткізудің бүгінгі таңдағы маңыздылығын баса айтты. Халықты мерекемен құттықтап, рухани келісім мен дінаралық татулыққа шақырды.
Әрі қарай, «Рухани келісім – бірліктің негізі» атты дөңгелек үстел отырысына қатысушылар өз пікірлерін ортаға салып, жиналған жұртпен ой бөлісті.
Бұл мереке – біздің қазақ халқы үшін атаулы күн. Себебі, ата-бабаларымыз әр уақытта да өз өмірінде ар мен ұятты жоғары бағалаған. Соның нәтижесінде, бүгінде елімізде түрлі ұлттар мен ұлыстардың және әртүрлі мәдениеттің өкілдері бейбітшілікте өмір сүріп жатыр. Олар қазақ халқының бойына сіңген дархандық, мейірімділік пен қонақжайлылық сынды қасиеттердің арқасында өздерін еркін сезінуде. Халқымыздың бойындағы бұл асыл қасиеттер ата-бабаларымыздың қанынан дарыған. Исламға дейінгі түркілердің далалық заңдарында бір адам қылмыс немесе қателік жасайтын болса, ол бүкіл рудың намысы саналатын. Сонымен қоса, бір адам қиыншылыққа тап болса, оған бүкіл ел болып, жұмыла көмек беретін. Міне, осы жақсы қасиеттер кейін, Ислам дінін қабылдаған соң да қазақ халқының бойынан жоғалмай, керісінше дамып, қуаттана түсті. Ислам дінін қабылдаған қазақ халқының бойындағы адамгершілік қасиеттер алдымен Құран мен хадис арқылы дамыса, кейін ол Ясауи бабамыздың еңбегі арқылы дарыды. Бүгінде жаһандану заманында осы адами құндылығымызды бойымызда жоғалтпай ұстау – біздің басты міндетіміз. Мұндай құндылықты көптеген халықтың бойынан табу қиын. Осындай асыл, адамгершілік қағидаттардың арқасында елімізде тыныштық пен ынтымақтастық берік орнауда. Сондықтан біз үшін бұл атаулы күннің маңызы зор.
Бүгінде осы игі бастамаға еліміздің барлық аймағы тарапынан қолдау көрсетіліп, түрлі іс-шаралар ұйымдастырылуда. Солардың бірі ретінде «Рухани келісім – халық бірлігіне бастар жол» атты дөңгелек үстелді айтуға болады. Аталған іс-шараға ауылдағы қоғамдық бірлестіктер мен мемлекеттік ұжымдар тартылды. Келген қонақтар өз ой-пікірлерін ортаға салып, рухани келісім мен діни тұрақтылық мәселелері бойынша түрлі тақырыпта әңгіме қозғауға мүмкіндік алды.
Тәуелсіз Қазақстандағы конфессияаралық жағдай, діни сенім бостандығы туралы түсінік, дінаралық қатынастардағы толеранттылық, ұлтаралық және дінаралық келісімнің қазақстандық модулі, Қазақстан Президентінің бейбітшілік пен дінаралық келісім орнату саласындағы саясаты осылайша, ауданымызда өткізілген түрлі іс-шаралар арқылы салтанат құрды.
Ербол Темирбулатов
