ген туристер тоғысатын шипалы Алакөл жағалауы биыл ерекше ән мен жырға бөленді. Облыс әкімі Берік Уәлидің бастамасымен қолға алынған «Алакөл алаулары – 2026» мәдени-туристік фестивалі аясында Абай өңірінің әрбір ауданы өздерінің шығармашылық бағдарламаларын ұсынуда. Бұл ауқымды жоба мыңдаған демалушыларды аймақтың бай мәдени мұрасымен таныстыруға және жергілікті өнерпаздарға қолдау көрсетуге бағытталған.
22 шілде күні бұл шығармашылық эстафетаны Бородулиха ауданы мақтанышпен қабылдап алды. Көлдің ең көрікті тұсында орналасқан «Alazon Arena» сахнасында аудандық Мәдениет үйінің өнерпаздары дайындаған үлкен мерекелік концерт өтіп, нағыз шабыт орталығына айналды. Кешке жиналған мыңдаған көрермен жазғы кештің ерекше атмосферасын сезініп, өнерпаздармен бірге ән шырқап, ыстық ықыластарын білдірді. Осылайша, Бородулиха ауданының өрелі өнері көпшіліктің жүрегінен жол тапты.
Концерттік бағдарламаның тізгінін ұстаған Арнұр Нұралан мен Анастасия Асанова алғашқы минуттардан-ақ алаңда шынайы мерекелік атмосфера орната білді. Үлкен сахнада Бородулиха ауданының намысын Жандос Қажыбеков, Мәдина Таласбекова, Анжела Мамедова, Асхат Оразаев, Дастан Заманбек, Лейла Мамедова және Данияр Мұрат сынды өнерпаздар жоғары деңгейде қорғап шықты. Көл жағасына жиналған балалы отбасылар, жастар мен аға буын өкілдерін өнерге деген ортақ махаббат біріктірді. Сахнадан естілген танымал әуендер жағалауды кернеп, жұртшылық әртістермен бірге би билеп, ерекше сәттерді телефондарына таспалады.
Көпшіліктің отандық эстрада жұлдыздарын асыға күткені жасырын емес. Аудан таланттарымен бірге сахна төрінде өнер көрсеткен Ақбота Керімбекова, Бақыт Шадаева, Бейбіт Қорған, Гүлдана Ноғайбаева және Серік Исахан сынды сүйікті әншілеріміз әсем ән мен жанды музыкадан шашу шашты. Өнер иелерінің әрбір шығуы ду қол шапалақпен ұласып, көрермендер танымал туындыларды орындаушылармен бірге шырқады.
Аудан тұрғындары үшін бұл кештің тағы бір ерекше маңызы болды. Концерттік бағдарламаның ең жарқын орындаушыларының бірі – BAYANSULU-дың Бородулиха топырағында туып-өскенін көпшілік біле бермейді. Ол дәл осы өңірдегі Әлихан Бөкейхан атындағы қазақ орта мектебінде білім алған. Бүгінде әнші еліміздің үлкен сахналарында сәтті өнер көрсетіп жүр. Оның мәдениет күндеріне қатысуы – Алакөл жағалауында болса да, туған өлкесіне деген символикалық оралуы іспетті. Бұл дерек жерлестеріміз үшін жағымды жаңалық қана емес, өздерінің талантты перзентін мақтан тұтудың тағы бір айқын дәлелі болды.
Ауқымды гала-концерт тек әнмен ғана шектелген жоқ, оның тәрбиелік, тағылымдық мәні де жоғары болды. Кеш барысында өнерпаздар мен жүргізушілер демалушыларды табиғатты аялауға және қоршаған ортаның тазалығын сақтауға шақырды. Жиналған қауымға қоқысты бейберекет тастамау, демалыс аймағына ұқыпты қарау және Алакөлдің бірегей табиғи келбетін бірге қорғау туралы маңызды үндеу тасталды. Осылайша, мәдениет күндері рухани демалыс сыйлап қана қоймай, тұрғындар мен қонақтардың экологиялық мәдениетін арттыруға бағытталған ерекше шара ретінде есте қалды.
«Алакөл алаулары» фестивалі – жай ғана концерттер тізбегі емес, өнер тілі арқылы туған өлкенің шығармашылық әлеуетін паш етудің, облыс қонақтарын талантты тұлғалармен таныстырудың бірегей мүмкіндігі. Бұл ауқымды шара әртістер үшін мыңдаған көрерменнің алдында өнер көрсету бақыты болса, ал демалушы қауым үшін жарқын эмоциялар мен жаңа жаңалықтарға толы ерекше сәт ретінде есте қалды.
Жиналған жұртшылық ұйымдастыру деңгейінің жоғарылығын, бағдарламаның әртүрлілігін және кештің шынайы атмосферасын ерекше атап өтті. Санаулы сағаттар ішінде Алакөл жағалауы Қазақстанның әртүрлі қалалары мен өңірлерінен келген өнерсүйер қауымның басын қосқан үлкен мәдениет алаңына айналды. Музыка, шығармашылық және шынайы эмоциялар арқылы Абай облысы мәдениетінің байлығын паш етуді көздеген фестивальдің басты идеясы да дәл осында болса керек. Бородулиха ауданы бұл жауапты міндетті жоғары деңгейде орындап шықты.
Ш.ДОСКЕЕВА,
«Жаңа уақыт»
