Көп кешікпей күн жылып, қар көбесі сөгіле бастайды. Тасқын судан келер қауіптің алдын алу – маңызды. Осы ретте аудан әкімі Айдар Ибраевтың төрағалығымен Төтенше жағдайлардың алдын алу және жою жөніндегі аудандық комиссияның кезекті отырысы өтті.
Күн тәртібінде су тасқыны қаупі бар кезеңге Бородулиха ауданының дайындығы және халықтың қауіпсіздігін қамтамасыз ету мәселесі, жергілікті хабарлау жүйесін енгізу, аудандық командалық-штабтық, кешенді оқу-жаттығуларын ұйымдастыру және өткізу жайы талқыланды.
Бородулиха аудандық Төтенше жағдайлар бөлімінің басшысы Әлішер Жұмабеков су тасқынының алдын алу бойынша атқарылған шаралар жайлы баяндай келе, су басу қаупі бар аумақтарға визуалды шолу жасалғанын және нәтижесіне сүйене отырып, қызыл судан төнер қауіп жоқ екендігін айтты. Сонымен бірге, бірнеше ауылдық округтердің әкімдері тасқынға тосқын қою мақсатында қолға алған істерімен таныстырды.
Көктемдегі қызыл судың көзі негізінен қыс бойы түскен қардың еруінен болатындығы белгілі. Жиында қар шығару жұмыстары, арықтар мен жылғаларды тазарту, инертті материалдар қорын әзірлеу мәселелері де қозғалды. Сонымен қатар, оқыс жағдайда тұрғындарды жылдам ақпараттандыру мақсатында дабыл жүйесін орнату, құтқарушылардың әзірлігін арттыру мақсатында оқу-жаттығуларын өткізу жайы да талқыланды. Тасқын су салғырттықты кешірмейтінін тілге тиек еткен аудан басшысы әр маман өз жұмысына үлкен жауапкершілікпен қарап, қауіпті кезеңге дайындықты ширатуды тапсырды.
А. МАҚЫШ
«Жаңа уақыт»
