24 сәуір күні Камышенка орта мектебінде шағын жинақты мектептердің бастауыш сынып мұғалімдеріне арналған «Бастауыш мектепте мотивациялық білім беру ортасын қалыптастыру. Кеше. Бүгін. Ертең» тақырыбында семинар өтті. Семинарға шағын жинақты 21 мектептен 33 мұғалім қатысты.
Жас ұрпақты біліммен қанаттандырумен қоса, ұлттық құндылықтарды дәріптеп, елжандылыққа тәрбиелеу – бүгінгі күні білім саласындағы өзекті мәселе. Шара барысында мектеп ауласына алты қанат киіз үй тігілді. Білім беру мекемесінің Әжелер мектебінің атсалысуымен дастарқан жайылып, мәртебелі меймандар ұлттық тағамдардан дәм татты.
Тақырыпқа сай мектеп ішінде «Қолөнер бұйымдары» көрмесі ұйымдастырылды. Семинар қатысушылары мектептің өлкетану және «Әскери даңқ» мұражайларына саяхат жасап, оқушылар Ақерке Сарқытбаева мен Назерке Бағзорова мұражай жәдігерлерімен таныстырды.
Шара бағдарламасы бойынша мектептің акт залында ашылу салтанаты өтті. Мұнда Бородулиха білім бөлімінің әдіскері С.Варфоломеева мен мектеп директоры Еркебұлан Болатханов сөз алып, семинардың сәтті өтуіне тілектестік білдірді.
Білімнің іргетасы бастауыш сыныпта қаланады. Сондықтан оқушыларға ынталандыратын орта қалыптастыру – әр мұғалімнің міндеті. Ынталандырушы ортаны қалай құру керек? Осы орайда мектеп мұғалімдері өз әдіс-тәсілдерімен бөлісіп, ашық сабақтарын көрсетті. Ұстаздар Т.Жұмадилова математика пәнінен «Есептер шығару» тақырыбында ашық сабағын, Г.Жұмадилова жаратылыстану пәнінен «Жаз мезгілінде аяз қайда кетеді?» атты зерттеу сабағын, А. Жолдобалинова цифрлық сауаттылық пәнінен «Power Point:«Ертегілер елінде» шағын жоба жасау сабағын, Е.Ашемахер математика пәнінен «Төлем және ұсату» атты сабағын көрсетті. Сонымен қатар О.Юлдашева орыс тілінен «Хабарлау мәтіні» тақырыбында және Б.Кабдолданова қазақ тілі пәнінен «Нәтиже сабақ» тақырыбында сабақ өтті. Барлық сабақтарда жаңа технологиялар, жасанды интеллект қолданылып, қалыптастырушы бағалау әдістері көрсетілді.
Ғаламтор мен жоғары технологияның дамыған заманында ақпараттық технологиясыз сабақты тиімді өткізу мүмкін емес. Осы бағытта Жезкент орта мектебінің бастауыш пәнінің мұғалімі Е.Судкова және Камышенка орта мектебінің бастауыш сынып мұғалімі Т.Жұмадилова «Бастауыш сыныптағы жасанды интеллект: оқушыларды оқыту және дамыту үшін қалай пайдалану керек?» тақырыбында шеберлік сынып көрсетті. Шеберлік сынып ерекшелігі семинар қатысушыларына белгілі тапсырмалар беріліп, оны көрсетілген білім платформасында орындау болды. Бұл әрі қызықты, әрі пайдалы болғаны қатысушылардың көңіл-күйінен белгілі еді.
Семинар соңында қатысушылар пікір білдіріп, алған әсерлерімен бөлісті. Семинар қатысушылар мен аудандық білім бөлімі тарапынан жоғары бағаға ие болды.
Бұл шара «Жас келсе – іске» демекші, жуырда ғана мектеп басшысы болып тағайындалған Еркебұлан Болатхановтың іскерлігінің, ұйымшыл ұжымның, оқушылар мен ата-аналар бірлігінің көрінісі іспетті. Жігерлі басшының бастамасымен ұйымшыл ұжым әлі талай толайым табыстарға қол жеткізетініне сенім бар.
Ай-Көркем МАҚЫШ,
«Жаңа уақыт»