Жақында Бородулиха ауданында VIII шақырылымдағы аудандық мәслихаттың кезекті елу бірінші сессиясы өтті. Мәслихат төрағасы С. Урашеваның жетекшілігімен өткен бұл жиында өңірдің әлеуметтік-экономикалық тыныс-тіршілігіне тікелей әсер ететін, халықтың өмір сүру сапасы мен қауіпсіздігіне бағытталған маңызды мәселелер талқыланды.
Сессияның бас баяндамасын жасаған аудан әкімінің міндетін атқарушы Талғат Батырұлы Мұратов бес айдың қорытындысы бойынша атқарылған жұмыстарды ортаға салды. Есепті кезеңде ауданның өнеркәсіп өндірісі 38,4 млрд теңгені құрады. Әсіресе өңдеу өнеркәсібі мен ауыл шаруашылығы салаларында оң серпін байқалады.
Қазіргі таңда ауданда жалпы сомасы 11 ірі инфрақұрылымдық жоба жүзеге асырылуда. Дмитриевка ауылындағы кіреберіс стеласы мен Бородулиха ауылындағы хоккей кортын жөндеу жұмыстары толық аяқталды. Сонымен қатар, Переменовка ауылындағы су желілерін жаңғыртуға 210 млн теңге, Новопокровка ауылынан мәдениет үйін сатып алуға 535,6 млн теңге қаралған. Ауыл ішілік жолдарды жөндеу және көшелерді жарықтандыру жобалары да жүйелі түрде атқарылып жатыр.
Аудандық мәслихат депутаттары аудан басшысының есебін бекіте отырып, даму бағдарламаларының мақсатты көрсеткіштеріне уақтылы қол жеткізуді бақылауда ұстауды ұсынды.
Өңірдегі өрт қауіпсіздігінің жай-күйі туралы аудандық Төтенше жағдайлар бөлімінің бастығы Қайрат Төлеуғазин баяндама жасады. Ауданда жалпы өрт саны 37,3%-ға азайғанымен, орман өрттерінің 23 жағдайға дейін өсіп, жиілеуі алаңдаушылық туғызып отыр. Тілсіз жаумен күресті күшейту мақсатында ТЖ бөліміне орман-дала өрттерінің алдын алу жоспарын қатаң қадағалау және халық арасында БАҚ арқылы түсіндіру жұмыстарын жандандыру жүктелді.
Соңы 2-бетте
Соңы. Басы 1-бетте
Үшінші мәселе бойынша білім бөлімінің басшысы Динара Атаева балалардың жазғы демалысы мен сауықтырылуын ұйымдастыру барысын баяндады. Биыл ауданда 3640 бала (оқушылардың 82%-ы) жазғы тынығумен және пайдалы жұмыспен қамтылады. Әлеуметтік осал санаттағы балалар мектеп жанындағы лагерьлерде және «Солнечный» қала сыртындағы сауықтыру орталығында демалуда. Бұған жалпыға міндетті білім беру қорынан 15,3 млн теңге бөлінген.
Сондай-ақ, мектептер жанынан көгалдандыру бригадалары мен мектеп орманшылықтары құрылып, балалар еңбекпен қамтылды. Барлық мектептерде бейнебақылау, өрт және дабыл жүйелері жұмыс істеп тұр.
Кәсіпкерлік және ауыл шаруашылығы бөлімінің басшысы Альви Мартаев аудандағы мал шаруашылығы саласының жай-күйін саралады. Ауданда мал шаруашылығы өнімдерінің жалпы көлемі 5 млрд 895,1 млн теңгені құрап, өткен жылмен салыстырғанда 5%-ға өскен. Өңірде мал өсірумен белсенді айналысатын 75 шаруашылықтың ішінде асыл тұқымды бағытты дамытып отырғандары ерекше атап өтілді. Мәслихат бұл сала бойынша мал бордақылау алаңдарын ашуды, сүт қабылдау пункттерінің желісін дамытуды және ветеринарлық-профилактикалық шараларды күшейтуді ұсынды.
Тұрақты комиссияның төрағасы Кималидин Апенов бірінші жартыжылдықта атқарылған жұмыстардың есебін ұсынды. Комиссия мүшелері заңдылықты сақтау, өрт қауіпсіздігі және Жезкент кентіндегі кондоминиум нысандарын күтіп ұстау мәселелерін жіті қадағалап, жауапты бөлімдерге нақты ұсыныстар жолдады.
Депутаттар халықпен тығыз байланыс орнатып, қайырымдылық және қоғамдық жұмыстарға белсенді қатысуда. Шаруашылық жетекшілері болып табылатын депутаттар ауыл жолдарын тазалау мен грейдерлеу жұмыстарына, «Таза Қазақстан» акциясына өз техникаларын тегін бөліп келеді. Ал әлеуметтік салаға жауапты депутаттар спорттық шараларға тұрақты демеушілік жасап, көпбалалы отбасылар мен ерекше балаларға әлеуметтік көмек көрсетуді дәстүрге айналдырған.
Сессия қорытындысы бойынша қабылданған барлық шешімдердің орындалуын бақылау мәслихаттың тиісті тұрақты комиссияларына жүктеліп, алдағы бірлескен жұмыс жоспарлары бекітілді.
Шайза АСАНҚЫЗЫ,
«Жаңа уақыт»
