Өткен аптада Бородулиха ауданында Бородулиха ауданы әкімінің орынбасары Қайрат Сапоров пен Абай облысы ішкі саясат басқармасы басшысының орынбасары Назерке Аққожинаның төрағалығымен «Қазақстандағы этномедиация тәжірибесі: мәселелер мен перспективалар» атты ғылыми-тәжірибелік конференция болып өтті. Бұл шара кәсіби медиаторларды, ғалымдарды, заңгерлерді және қоғамдық ұйым өкілдерін біріктіріп, түрлі салалардағы, соның ішінде этносаралық дауларды реттеудегі медиацияның өзекті мәселелерін талқылауға арналған алаң болды.
Аталмыш шараға ғалымдармен қатар Бородулиха ауданындағы ауылдық округ әкімдері, медиация саласының мамандары, педагогтар, заңгерлер және құқық қорғау органдарының қызметкерлері жиналды.
Конференцияның басты мақсаты — Қазақстанда медиацияны қолданудың жетістіктерін талқылау, мамандар арасында тәжірибе алмасу және қоғамда медиативтік қызметтерді танымал ету. Қатысушылар этносаралық медиацияға ерекше назар аударып, оның көпұлтты мемлекетте тұрақтылық пен келісімді сақтаудағы маңыздылығын атап өтті, сондай-ақ болашақта оны дамыту жолдарын қарастырды.
Жиналғандар алдында Бородулиха ауданы әкімінің орынбасары Қайрат Сапоров конференцияны алғысөзбен ашып, этномедиацияның қақтығыстардың алдын алудағы маңызын айтты. Ол сонымен қатар өз сөзінде Бородулиха ауданының көпұлтты өңір екенін және этносаралық қарым-қатынасты сақтау негізгі басымдықтардың бірі екенін де баса атап өтті.
Конференцияда медиация және этносаралық өзара әрекеттестік саласында тәжірибесі мол сарапшылардың мазмұнды баяндамалары ұсынылды.
Шәкәрім атындағы университеттің профессоры Амантай Исин «Ортағасырлық тарихи деректердегі ұлттық бірлік туралы білім» тақырыбында баяндама жасады. Ол тарихи сабақтардың қазіргі қоғамдағы келісім мен бірлікті нығайту үшін маңызды екенін тілге тиек етті.
Заң ғылымдары бойынша PhD докторы Әлия Толыспаева «Әлеуметтік, ұлттық және діни алауыздықты болдырмаудағы құқықтық мәдениеттің рөлі» тақырыбында баяндама жасады. Ол азаматтардың құқықтық сауаттылығы мен заңға құрметі қақтығыстардың алдын алуда маңызды шарт екенін айтты.
Қазақстан Республикасы Президентінің жанындағы Мемлекеттік басқару академиясы Абай облысы филиалының директоры Әсет Әбжақов этномедиацияны жүргізу технологиялары туралы баяндама жасады. Өз сөзінде ол медиативтік әдістердің тиімділігін дәлелдейтін табысты жобаларды ұсынды.
Ал, «Сана» қоғамдық бірлестігінің төрағасы Ұлан Тлемісов этносаралық қақтығыстардың алдын алуда үкіметтік емес ұйымдардың рөлі туралы баяндама жасады. Ол үкіметтік емес ұйымдардың мемлекеттік құрылымдар мен қоғам арасында байланыстырушы буын ретінде әрекет етіп, қақтығыстарды шешуге ықпал ететінін ерекше атап өтті.
Конференция қорытындысы бойынша Қазақстанда этномедиацияны дамытуға бағытталған бірқатар ұсыныстар жасалды. Атап айтсақ, этносаралық медиация саласындағы медиаторлардың кәсіби деңгейін арттыру үшін арнайы тренингтер мен семинарлар өткізу, қоғамға дауларды бейбіт жолмен шешу мүмкіндіктері туралы ақпарат беру жұмыстарын күшейту, жастар арасында қақтығыстарды бейбіт реттеу дағдыларын қалыптастыру үшін университеттер мен мектептерде медиация негіздері бойынша курстар енгізу, мемлекеттік органдар, білім беру мекемелері мен үкіметтік емес ұйымдар арасындағы серіктестікті дамыту қажет.
Бородулиха ауданында өткен конференция этномедиацияны қоғамдағы тұрақтылықты сақтау құралы ретінде нығайту жолындағы маңызды қадам болды. Шара медиацияның этносаралық дауларды шешудің тиімді әдісі екенін және көпұлтты ортада қарым-қатынастарды үйлестіруге ықпал ететінін көрсетті.
Қатысушылар осындай шаралардың жалғасуы маңызды екенін атап өтті. Бұл конференция кәсіби медиаторлар, ғалымдар мен қоғамдық белсенділердің күш-жігерін біріктіруге көмектесіп, Қазақстанда медиацияны одан әрі дамытуға серпін берді.
Ай-Керім СӘРСЕНҚАЛИ,
«Жаңа уақыт»
