«Саламатты өмір салты, дене шынықтыру мен спортты дамыту — елімізді дамыту стратегиясының маңызды міндеттерінің бірі. Сондықтан ауданымызда бұқаралық спортты дамытуға ерекше мән беріліп, спорт алаңдары көбейіп, мектептер мен спорт үйірмелерінде дене шынықтырумен шұғылданушылар саны артып келеді.
Мәселен, Зенковка ауылында шағын футбол алаңы мен воркаут алаңы ашылды. Жергілікті бюджет есебінен шағын футбол алаңына 16 млн 941 мың теңге және воркаут алаңының құрылысына 16 млн 952 мың теңге қаражат жұмсалды. Спорт нысандарының құрылысын ТОО «ЖАҢА СЕМЕЙ. KZ» сапалы жүргізген. Құрылыс жұмыстары осы жылдың 14 маусым айында басталып, 15 қыркүйек күні шағын футбол мен воркаут алаңы пайдалануға берілді.
Спорт – адам денсаулығының кепілі. Осы салада бірқатар спортшыларымыз тер төгіп, қазіргі таңда байрақты бәсекелерде топ жарып жүр. Спортшылардың дайындығы үшін қолдау қажет екені анық. Елімізде спорттың дамуы да мемлекет алдындағы міндеттердің бірі. Сондықтан жаңадан ашылған шағын футбол және воркаут алаңы — мемлекеттің жалпы бұқаралық спортты дамытуға қосқан үлесі.
– Ауылымызда шағын футбол алаңы, воркаут алаңы бұрын-соңды болмаған. Ал бізде бала көп, үлкендер де бір жерде серуендеу керек қой. Бірінде ойын алаңы болса, екіншісінде воркаут, спорттық құрал-жабдықтармен жабдықталған. Сондай-ақ, алаңда күнқағарлары бар орындықтар, қоқыс жәшіктері және жарықдиодты шамдары бар жарықтандыру бағаналары орнатылған. Саябақ аумағы қоршалған. Біздің балалық шағымызда спортпен шұғылдану үшін мұндай жағдай болмады. Ал қазір жастар үшін барлық мүмкіндік бар. Көптеген табысты азаматтарымыз туған ауылы мен аудандарына қолдау көрсетеді деп ойлаймын. Шағын футбол алаңы, воркаут алаңы жаттығатындардың арасынан болашақ чемпиондар шығады деп сенемін, — дейді ауыл тұрғыны.
Талай әлемдік додада елдің мерейін үстем етіп, көк байрағымыздың көкке көтерілуіне Зенковка ауылының спортшылары да зор үлесін қосып келе жатқаны баршаға аян. Осы ретте шағын футбол алаңының салынуы – бұқаралық спорттың дами түсуіне үлкен септігін тигізетіні сөзсіз.
Осы орайда, тұрғындарды жаңа шағын футбол алаңы мен воркаут алаңының ашылуымен құттықтаймыз. Әрдайым салауатты өмір салтын қалыптастыратын сайыпқыран спортшылар көбейіп, ел абыройының асқақтай беруіне тілектеспіз.
Ербол Темирбулатов
