Халықты жұмыспен қамту, елде жұмыссыздықты шектеу – бүгінгі күннің басты мәселелерінің бірі. Осы орайда, жер-жерде ауқымды іс-шаралар өткізілуде. Еліміз бойынша оңтайлы бағдарламалар қабылданып, жүзеге
асырылуда.
Сол бағдарламалар аясында жаңа жұмыс орындары ашылып, ел нәпақа тауып отыр. Дегенмен, кей жерлерге жұмысшы қолы жетіспей жатады. Осы орайда, бос жұмыс орындары жәрмеңкесін өткізу де дәстүрге дендеп еніп келеді.
25 тамыз күні аудандық Мәдениет үйінде Мансап орталығы жұмыс іздеушілерге, жұмыссыз жастарға, еңбекке қабілетті мүгедектерге, көп балалы, аз қамтылған отбасы мүшелеріне арналған бос орындар жәрмеңкесін өткізді. Жәрмеңкеге 70-тен астам жұмыссыз адам қатысты. Оны өткізудегі мақсат – жұмыссыз азаматтардың жұмысқа орналасуына және жұмыссыз азаматтарға лайықты мамандық таңдауда жәрдемдесу. Бос жұмыс орындары жәрмеңкесінде қызметтің әртүрлі салаларындағы 20 кәсіпорыннан 200 бос жұмыс орны ұсынылды: мемлекеттік қызмет көрсету, білім беру, қаржы, әлеуметтік қызмет көрсету, тау-кен өнеркәсібі, көлік-логистика және т.б.
Жәрмеңкеде бос жұмыс орындарымен қатар, жұмысқа орналасу және мемлекеттік қолдау шараларына қатсу бағытында көптеген кеңес берілді. Бұл іс-шараны жұмыссыздар мен жұмыс берушілер арасындағы алтын көпір деуге болады. Мұндай шаралардың жемісін көріп, жұмыс тапқан, мамандық алған адамдар да көп.
Бос жұмыс орындары жәрмеңкесінің қорытындысы бойынша 2 адам қоғамдық жұмысқа, 1 адам Переменовка орта мектебіне жастар тәжірибесіне жіберілді. 2 адам Бородулиха ауданы бойынша мемлекеттік кірістер басқармасына жетекші маман болып тұрақты жұмысқа орналасты. 12 адам тау-кен кәсіпорындарында, мемлекеттік кірістер департаментінде, денсаулық сақтау саласында, Бородулиха ауданы әкімінің аппаратында жұмыс берушімен әңгімелесуге шақырылды. Сонымен қатар, жәрмеңке барысында қажетті жұмыс орындарын таңдау, жастар тәжірибесінен өту, әлеуметтік жұмыс орындары мен қоғамдық жұмыстарға қатысу, өз кәсібін ашуда мемлекет тарапынан берілетін несие, аз қамтылған отбасыға берілетін жаңа форматтағы атаулы әлеуметтік көмек бойынша кеңестер берілді.
Ербол Темирбулатов
