Бала тәрбиесі – бесіктен» демекші, адам өміріндегі ең маңызды тәлім-тәрбиенің іргетасы балабақша қабырғасында қаланады. Жас шыбықты мәпелеген бағбан іспетті, кішкентай бүлдіршіндердің бойына өнер мен ізгіліктің дәнін егіп жүрген жандардың бірі – Бородулиха ауданындағы «Солнышко» балабақшасының музыка жетекшісі Самиға Сейтқалиқызы Ашамаева. Бүгінгі әңгімеміз өз кәсібін өмірінің мәніне айналдырған осынау абзал жан туралы болмақ.
Мұқан Төлебаев атындағы музыкалық колледждің түлегі Самиға Сейтқалиқызының «Солнышко» балабақшасында еңбек етіп келе жатқанына биыл 16 жыл толды. Осы уақыт ішінде ол қаншама бүлдіршінді өнер бесігіне бөлеп, сахна мәдениетіне баулыды. Алайда, кез келген маман сияқты оның да алғашқы еңбек жолы оңай басталмаған еді. Самиға Сейтқалиқызы алғаш жұмысқа келгенде балалармен жұмыс істеу әдістемесін толық білмегендіктен, бойында қорқыныш болғанын жасырмайды. Сол бір сындарлы сәтте оған бағыт-бағдар беріп, кәсіби тұрғыда шыңдаған балабақшаның тәжірибелі әдіскері Светлана Борисовна болатын. Алғашқы ұстазының үнемі сабақтарға қатысып, қателіктерді түзеп, бағыттауы Самиға Сейтқалиқызының нағыз маман болып қалыптасуына үлкен септігін тигізді.
Тәжірибелі педагогтың пайымдауынша, музыка – баланың ең басты жан азығы. Балабақшадағы музыка сабағы тек ән айтып, би билеумен шектелмейді. Ол – баланың шығармашылық қабілетін дамытып, ішкі дүниесін байытатын маңызды құрал. Осы орайда музыканың кішкентай бүлдіршіндерге тигізер пайдасы орасан зор.
«Музыка баланың сөйлеу және есте сақтау қабілетін жақсартады, қиял мен шығармашылығын қарқынды дамытады. Сондай-ақ, ырғақ сезімін оятып, қимылдарды үйлесімді орындауға баулиды. Эмоцияны жеткізу мен өзін еркін білдіруге көмектесіп, топпен жұмыс істеу дағдысын ерте қалыптастырады», – дейді Самиға Сейтқалиқызы.
Тәлімгер үшін балдырғандардың әр нотада күлімдеп, шаттануы – жұмысына деген ең үлкен шабыт көзі.
Сонымен қатар, балабақшада бүлдіршіндердің бойына ұлттық құндылықтарды сіңіру – басты бағыттардың бірі. Күнделікті оқу-тәрбие үдерісінде салт-дәстүр мен қолөнерді дәріптеуге ерекше мән беріледі. Бүгінде мекеме ұжымы «Әже мектебі», «Аналар мектебі» және «Әке мектебі» сияқты бірегей жобалар аясында ата-аналармен тығыз байланыс орнатқан. Ал музыка сабағында балаларға қасиетті аспаптарды таныстыру, халық әндері мен күйлерін тыңдату, ұлттық билерді үйрету – ұстаздың күнделікті шығармашылық жұмысының ажырамас бөлшегі.
Өз ісіне шебер маман жұмыстан тыс уақытта да жан-жақтылығымен ерекшеленеді. Бос уақытында кітап оқып, спортпен шұғылданатын, мың бұрала би билеп, ән айтатын Самиға Сейтқалиқызы бұл хоббилерінің бойына жаңа күш-қуат пен шабыт сыйлайтынын айтады. «Бала тәрбиесі – тал бесіктен» қағидасын ұстанған педагогтың басты мақсаты – Отанын сүйетін саналы да тәрбиелі ұрпақ өсіру.
Тәжірибелі маманның ұжымдағы беделі мен еңбекқорлығы туралы «Солнышко» балабақшасы меңгерушісінің міндетін атқарушы Айнұргүл Нұртайқызы Майкенова өзінің жылы лебізін білдірді:
— «Самиға Сейтқалиқызы – өз ісіне жауапты, шығармашыл әрі бала
жанын терең түсінетін білікті маман. Ол ұйымдастырған әрбір мерекелік шара жоғары деңгейде өтеді. Балалардың бойындағы талантты дөп басып тауып, сахнаға бейімдеудегі еңбегі ерен», — дейді балабақша басшысы.
Самиға Сейтқалиқызының еңбегі тек ата-аналар мен ұжым арасында ғана емес, облыстық және аудандық деңгейде де жоғары бағаланып келеді. Педагогтың кәсіби біліктілігі мен ізденімпаздығы оның мазмұнды марапаттарынан айқын көрінеді.
Мәселен, ол Абай облысының Білім басқармасына қарасты Мұқан Төлебаев атындағы музыка училищесінде өткен «Білім беру мекемелерінде музыкалық білім берудегі инновациялық тәсілдер» атты облыстық семинар-практикумға белсене қатысып, өз біліктілігін ресми сертификатпен бекітті. Тәжірибелі ұстаз бұнымен шектелмей, аудандық деңгейдегі «Білім келешегі: адал азамат – кәсіби маман» атты Тамыз конференциясының секциялық отырысында және «Балалардың тәжірибе жасауы – қоршаған әлемді тану құралы» атты аудандық семинарда өзінің озық педагогикалық іс-тәжірибесін таратқаны үшін Білім беру бөлімінің арнайы Мадақтама грамоталарымен марапатталды. Сондай-ақ, ұрпақ тәрбиелеудегі ұзақ жылғы адал еңбегі мен қол жеткізген табыстары үшін халықаралық мерекелер аясында балабақша басшылығы мен кәсіподақ комитетінің де ерекше құрметі мен ыстық ықыласына бөленіп келеді.
«Жұмыла көтерген жүк жеңіл» дегендей, балабақша ұжымының ортақ мақсаты – балалардың жарқын болашағы. Сұхбат соңында Самиға Сейтқалиқызы әріптестеріне шығармашылық табыс пен еңбектеріне береке, ал ата-аналар қауымына отбасылық амандық пен бірлік тіледі.
Жүрегі жылылыққа, жаны әуенге толы Самиға Сейтқалиқызы Ашамаеваның ұрпақ тәрбиесіндегі еңбегі жана берсін дейміз. «Солнышко» балабақшасына шуақ шашып, бүлдіршіндердің жүрегіне өнер мен ұлттық тәрбие нәрін құйып жүрген ұстаздың шығармашылық жолы әрдайым табыстарға толы болғай!
Ш.ДОСКЕЕВА,
«Жаңа уақыт»
