Халықаралық әйелдер күніне орай Бородулиха ауданында ауқымды шаралар ұйымдастырылды. Мереке қарсаңында аудан әкімі Айдар Ибраев әр түрлі салада еңбек етіп жүрген әйеледер қауымымен кездесті. Ақ жаулықты аналарды, ақ кимешек әжелерді шаңырақтарына барып құттықтады. Сонымен қоса, Аудандық Мәдениет үйінде өткен салтанатты шарада нәзік жандыларға құрмет көрсетілді.
Аудан әкімімен кездесуге білім, мәдениет, спорт, денсаулық сақтау, құқық қорғау, ауыл шаруашылығы, кәсіпкерлік және өзге де салаларда еңбек етіп жүрген әйелдер қауымы қатысты.
— Біздің қоғамымызда әйел тек отбасының береке-бірлігінің ұйытқысы ғана емес, ол мемлекеттік қызмет пен қоғамдық істе де, кәсіпкерлік пен тәлімгерлікте де тамаша табыстарға қол жеткізе отырып, саяси мәселелерге белсене араласатын қоғам мүшесі. Сондықтан елімізде әйел адамның әлеуметтік қорғалуына, олардың өмір сүру деңгейін арттыруға айрықша мән беріледі.
Сіздер еселі еңбектеріңізбен Бородулиха ауданының гүлденуіне үлес қосып келесіздер.
Бүгінгі таңда білім беру, денсаулық сақтау, ауыл шаруашылығы, кәсіпкерлік пен қоғамдық қызмет салаларында ерен еңбек етіп жүрген барша әйелдер қауымына ерекше алғысымды білдіремін. Сіздердің табандылықтарыңыз бен адал еңбектеріңіздің арқасында ауданымыз қарқынды дамып, өркендеуде, — деді құттықтау сөзінде Айдар Маратұлы.
Кездесу қонақтарына дастарқан жайылды. Мәдениет үйінің өнерпаздары ән мен жырдан шашу шашып, мерекелік көңіл күй сыйлады. Абзал аналар емен-жарқын әңгімелесіп, аудан басшылығына риясыз ризашылығын білдірді.
Мереке қарсаңында Айдар Маратұлы «Алтын алқа» төсбелгісімен марапатталған ана Рысқайша Дюсенбаеваның шаңырағына арнайы барып, құттықтады. Жеті бала тәрбиелеп өсірген ақ жаулықты ана 2013 жылдан бері Бородулиха ауылында тұрады. Отағасы екеуі ұлды ұяға, қызды қияға қондырып, ұрпақтарының қуанышына бөленіп, немерелерін бағып отырған ардақты ата-әже.
Сонымен қатар, аудан әкімі көп балалы ана Олеся Чечулинаға да құрмет көрсетті.
— Ана болу – бақыт, көп балалы ана болу – ерлік. Өздеріңіздей алтын құрсақты аналарға қандай құрмет көрсетсек те артықтық етпейді. Сіздер өмірге перзент әкеліп, ел тірегі болатын ұрпақ тәрбиеледіңіздер. Бүгінгі күні әже атанып, жас келіндерге үлгі-өнеге болып отырсыздар,- деді Айдар Маратұлы.
Қазіргі таңда нәзік жандылар түрлі салада, тіпті ер адамдар басым болған өндіріс орындарында да табысты еңбек етуде. Мереке қарсаңында аудан әкімінің орынбасары Марат Теміржанов Сосновка ауылының тұрғыны, көп балалы ана, қамқор әже Әлия Оразбаева мен Дмитриевка ауылының тұрғыны, ардагер ұстаз Тамара Нетруненконы мерекемен құттықтап, сый-сыяпат жасады.
Әлия Жамаділқызы 19 жыл бойы Орлов өндірістік кешенінде өнім бақылаушысы болып кен орнында ерлермен иық терестіріп еңбек етіп жүр.
Тамара Тимофеевна «Қазақ КСР халық ағарту ісінің үздігі» атағына ие болып, «Еңбек ардагері» медалімен марапатталған, 1986 жылы «Еңбек Қызыл Ту» орденімен наградталған ардагер ұстаз. Адал еңбек әрқашан үлкен құрметке лайық.
Мереке қарсаңында ұйымдастырылған шоқтығы биік шаралардың бірі – аудандық Мәдениет үйінде өткен салтанатты жиын. Жиынға өз саласында жетістікке жеткен қыз-келіншектер қатысты.
— Нәзік жандыларымыз еліміздің қоғамдық-саяси өміріне де белсене атсалысуда. Өскелең ұрпаққа өнегелі тәлім-тәрбие беру ісінде әйелдер айрықша рөл атқарады. Асыл аналардың еңбегі қандай құрметке де лайық. Қоғамда үндестік пен үйлесімді, өзара түсіністік пен татулықты нығайтуға ұйытқы болып жүрген аяулы жандар еліміздің өркендеуіне үлес қоса береді деп сенеміз.
Асыл әжелер, ардақты арулар, қызғалдақтай қыздар!
Шұғылалы мереке қарсаңында дендеріңізге саулық, еңбектеріңізге толағай табыс, бақ-береке тілейміз! – деді құттықтау сөзінде Айдар Маратұлы.
Шара аясында ауданның дамуына сүбелі үлес қосқан әйелдер аудан әкімінің алғыс хатымен марапатталды.
Салтанатты кеш аудандық Мәдениет үйі әртістерінің мерекелік концертімен жалғасты.
Ай-Керім СӘРСЕНҚАЛИ,
«Жаңа уақыт» 
