Жұматай Табылдыұлы Қазыханов — Орлов өндірістік кешені қызметкерлерді басқару қызметіне қарасты оқыту бөлімінің қауіпсіздік техникасы және еңбекті қорғау жөніндегі маманы. Елу жылдық еңбек өтілі барысында ол тау-кен саласындағы 15-тен астам кәсіпті игерген.
Осы орайда, біз бірегей әріптесімізбен жақынырақ танысқанды жөн көрдік.
Жұматай Табылдыұлы Аягөзде теміржолшының отбасында туып-өсті. Әкесі станцияда тепловоз машинисі болып жұмыс істеген, соғыс ардагері. Анасы хатшы және тыл ардагері болған.
— Мен бала кезімнен шахтер мамандығы туралы армандадым деп айта алмаймын. Әскерден келген соң үйлендім. Жұбайымның туған жері – Кентау. Мен сол жаққа барған кезде шахтердің еңбегі қандай екенін көргім келді. Отбасымызда үш баламыз – ағам, әпкем және мен. Бір қызығы, бәріміз, бірақ әртүрлі уақытта тау-кен өнеркәсібінде жұмыс істеппіз, – дейді Жұматай Табылдыұлы.
Жұматай Табылдыұлы 1973 жылдан 1981 жылға дейін Кентауда тау-кен жұмысшысы, скреперші, бекітуші, жарғыш және үңгуші болып жұмыс істеді. Кейін ата-анасына жақын жерге көшуге шешім қабылдап, Жезкент кентіне келді. Алдымен Шахтостройда үңгуші, шебер, учаске бастығы, бас инженер болып жұмыс істеді. Кейін Жезкент тау-кен байыту комбинатына №1 жерасты өндіру учаскесінің бастығы болып ауысты. 30 жылдан астам № 2, 3, 4 жерасты өндіру учаскелерінің, тау-кен үңгілеу жұмыстары учаскесінің, дизель көлігі учаскесінің, тау-кен қазбаларын бекіту учаскесінің, көлденең шахтаішілік көлік учаскесінің бастығы, техникалық бөлімнің, өндірістік бөлімнің бастығы, комбинаттың техникалық директоры болды. 2019 жылы зейнеткерлікке шыққаннан кейін өндірістегі үлкен тәжірибесін ескере отырып, оны жас қызметкерлерге білім беру үшін оқыту бөліміне маман ретінде шақырды.
Ол әріптестерімен бірге оқыту жоспарын әзірлейді, таныстырылымдар мен оқыту қорытындысы бойынша құжаттамалар дайындайды. Арнайы сыныпта оқыту өткізеді. Ол әрқашан да жұмысты қауіпсіздіктен бастайды, қауіпсіздік техникасы ережелерін бұзу жағдайларын жіті назарда ұстау қажет деп санайды.
Жұматай Табылдыұлының жан жарымен отау құрғанына 40 жылдан асқан. Әйелі ұзақ уақыт бойы Орлов өндірістік кешені автоматика цехінде бақылау және өлшеу құралдары слесарі болып жұмыс істеді, қазір зейнеткерлік демалыста. Олардың үш қызы, алты жиен немересі бар. Дегенмен, балаларының ешқайсысы ата-анасының жолын қумады.
Жұматай ағамыз бос уақытында бағбаншылықпен айналысады. Демалыс және еңбек демалысы күндері белсенді өмір салтын ұстанғанды жақсы көреді: отбасымен бірге тауға шығады, табиғат аясында демалып, балық аулауға барады, саяхаттайды.
Бахтияр Түлеков,
Орлов өндірістік кешені