Қазақстанның жастары – мемлекетіміздің басты байлығы. Еліміздің болашағы да жастар, сондықтан оларға үлкен үміт артылып отыр. Тәуелсіздік жы묬дарында көп жетістікке қол жет¬кіз¬дік. Осы орайда, жуырда аудандық әкімдіктің кіші залында Бородулиха ауданының әкімі Айдар Ибраевтың төрағалығымен кезекті Жастар ісі бойынша кеңес отырысы өтті.
Отырысқа кеңес мүшелері, ауылдық округ әкімдері және БАҚ өкілдері қатысты. Жастар саясатына қатысты аудан бойынша жүйелі жұмыстар жүргізіліп келе жатыр. Жиында 2 мәселе қаралды. Жиында алғашқы болып сөз алған мәдениет, тілдерді дамыту, дене шынықтыру және спорт бөлімінің басшысы Индира Бельская жастар арасында бұқаралық спорт түрін дамыту бағытында атқарылған жұмыстар жайлы баяндады.
Күн тәртібіндегі екінші мәселе бойынша, яғни NEET санатындағы жасөспірімдер арасында қылмыс пен құқық бұзушылықтың алдын алу бағытында
жүргізіліп жатқан жұмыстар туралы Бородулиха ауданының ішкі істер бөлімінің полиция мойоры, жергілікті полиция қызметінің басшысы Ермек Тұрарқанов ақпарат берді.
– Бородулиха аудандық полиция бөлімі қылмыстық құқық бұзушылықтардың алдын алуға бағытталған ұйымдастыру-тәжірибелік шараларды жүзеге асыруда. Ағымдағы жылдың 9 айында кәмелетке толмағандар тарапынан 3 қылмыс жасалды. Олардың 1-і Жезкент кентінде (ҚР ҚК-нің 293-бабының 2-бөлігі бойынша бұзақылық фактісі) және 2-уі Бородулиха ауылында (ҚР ҚК-нің 120-бабының 4-бөлігі бойынша зорлау фактісі). Қазақстан Республикасы Қылмыстық кодексінің 121-бабының 4-бөлігіне сәйкес, жыныстық сипаттағы зорлық-зомбылық фактісі бойынша 1 қылмыстық іс қозғалды. Кәмелетке толмағандардың жыныстық қол сұғылмаушылықтарына қарсы 4 қылмыс жасалды (Жезкент кентінде 1 факт, Бородулиха ауылында 3 факт).
Осы жылдың 3 тоқсанында полиция бөлімшесіне барлығы 335 кәмелетке толмаған жасөспірім жеткізілді, оның ішінде 305-і әкімшілік құқық бұзушылық жасағаны үшін, – деді ол.
Оның айтуынша, кәмелетке толмағандар арасындағы құқық бұзушылықтың алдын алу шара барысында жастардың көп шоғырланатын аумақтарды тексеру, жеңіл өмір салтын ұстанатын, көше кезетін кәмелетке толмағандарды анықтау мақсатында рейдтер ұйымдастырылып, көшелерде, аулаларда ата-аналармен, мұғалімдермен түсіндіру жұмыстары жүргізілді. Әрбір мектеп инспекторы құқықтық тақырыптарда жеке профилактикалық әңгімелесулер мен дәрістер өткізеді. Балалармен кездесулер барысында жасөспірімдерде басталуы мүмкін дағдарыстық жағдайлар талқыланады.
– Аудан әкімдігі жанындағы кәмелетке толмағандардың істері және олардың құқықтарын қорғау жөніндегі комиссия отырысында 2023 жылдың 3 тоқсанының қорытындысы бойынша барлығы 23 материал қаралды. Жедел жағдайды тұрақтандыру, сондай-ақ әкімшілік құқықбұзушылықтарды ашуды арттыру мақсатында Бородулиха аудандық полиция бөлімінің қызметкерлері тұрақты жұмыс жүргізуде, –деді Ермек Тұрарқанов.
Бұдан кейін, Бақы ауылдық округінің бас маманы Е. Дюсетаев округ бойынша жастар арасында жүргізіліп жатқан жұмыстар туралы ақпарат ұсынды.
– Бақы ауылдық округінде халық саны 1066 адам болса, 14 пен 35 жас аралығындағы жастар саны – 312 адам. Оның 55-і оқушы, студенттер – 10 адам, өзін-өзі жұмыспен қамтығандар – 13 адам, қызметкерлер – 60 адам. Жыл басынан бері сыбайлас жемқорлыққа қарсы күрес жүргізу, мемлекеттік бағдарламалар мен жобаларды түсіндіру мақсатында жастармен кездесулер өткізіліп келеді. «Қазақстан Республикасындағы діни ахуал және дәстүрлі емес діни бірлестіктердің қызметі туралы» тақырыбында ауылдық округтің ақпараттық-түсіндіру тобы мүшелерінің қатысуымен тікелей эфир өтті. Бақы ауылдық округі Ресей Федерациясымен шекарада орналасқандықтан, Қазақстан Республикасының мемлекеттік шекарасында қызметке тартылу жөнінде шекарашылардың қатысуымен ауыл жастарымен әңгімелесу жүргізіледі. 2023 жылдың 10 айында Бақы ауылдық округі жастары арасында қылмыс пен құқық бұзушылық орын алған жоқ. Нәтижелі жұмыспен қамтуды және жаппай кәсіпкерлікті дамыту бағдарламасы бойынша ауылдық округтегі шаруа қожалықтары мен жеке кәсіпкерлердің кәсіпорындарына жастар арасынан 4 адам қоғамдық жұмыстарға, 7 адам әлеуметтік жұмыс орындарына қабылданды, – деді Бақы ауылдық округінің бас маманы.
Сондай-ақ, жиында Таврия, Бородулиха ауылдық округтерінің әкімдері жастар арасында жүргізіліп жатқан жұмыстар туралы мәлімет берді.
Отырысты қорытындылаған аудан әкімі Айдар Маратұлы жастарға жол көрсетіп, әр түрлі бағдарлама аясында жұмыс жасап, күш біріктірсе, алынбайтын қамал жоқ екенін айтып, жастарға мемлекет тарапынан үлкен көмек жасалып жатқандығын жеткізді.
Өңір басшысы талқыланған барлық мәселе бойынша ауыл әкімдері мен сала басшыларына тиісті тапсырмалар берді.
Азамат Смагулов