Еліміздің Төтенше жағдайлар министрлігінің құрылымына кіретін Халық Қаһарманы Қасым Қайсенов атындағы 68303 әскери бөліміне жедел түрде жұмыс жүргізуге арналған жаңа арнайы автомобильдер мен жабдықтар берілді.
Техниканы беру салтанатты рәсімі Семей қаласының орталық алаңында өтті. Іс-шараға облыс әкімі Берік Уәли, Төтенше жағдайлар министрі Шыңғыс Әрінов, жеке құрам және төтенше жағдайлар қызметінің ардагерлері қатысты.
Заманауи машиналардың кілттерін әскери қызметшілерге ҚР Төтенше жағдайлар министрі генерал-майор Шыңғыс Әрінов өз қолымен тапсырды.
Автопарктің құрамында жолсыз және күрделі рельеф жағдайында жұмыс істеуге арналған өтімділігі жоғары автомобильдер бар. ТЖМ автопаркіне алғаш рет берілген барлық техника жаңа XV сериялы мемлекеттік тіркеу нөмірлерін алды. Бұл көліктің ведомстволық байланысын көрсетіп, оның визуалды сәйкестендірілуін күшейтеді.
Жалпы, облыс қайта құрылғалы бері өңірге 28 өрт сөндіру техникасы мен 24 инженерлі техника берілген. Бүгін құтқару қызметінің қажеттіліктеріне арналған 23 техниканың кілті жүргізушілерге тапсырылды. Олардың қатарында жоғары өтімді жүк көліктері, арнайы құтқару машиналары мен «Трэкол» көлігі бар.
Сонымен қатар рәсім аясында төтенше жағдайларды болжау және жою кезінде қолданылатын заманауи жабдықтардың арсеналы көрсетілді. Бұл мониторинг, байланыс және басқару технологиялары қолжетімді емес өңірлерде де тиімді жұмыс істеуге мүмкіндік береді. Келіп түскен техника пайдалануға беріліп, күнделікті қызметте — патрульдеу, мониторинг және шұғыл шығу үшін пайдаланылады. Бұл әскери-құтқару бөлімдеріне ресурстарды нақты жағдайда дереу пайдалануға мүмкіндік береді.
Айта кетсек, ҚР ТЖМ 68303 әскери бөлімі Павлодар, Шығыс Қазақстан және Абай облыстарының аумағындағы қауіпсіздікті қамтамасыз етеді. Бұл өңірлер су тасқыны, орман өрттері, сел жиі жүретін аймаққа жатады.
Салтанатты рәсімде сөз сөйлеген облыс әкімі Берік Уәли Төтенше жағдайлар министрлігіне алғыс айтып, жаңа техникалардың келуі өңір тұрғындарының қауіпсіздігі үшін жасалған маңызды қадам екенін атап өтті.
— Біздің аймақ – орманды-далалы, өрт қаупі жоғары өңір. Сондықтан бұл салада еңбек етіп жүрген азаматтарға артылар жүк те, сенім де мол. Олар антына адал, сертіне берік, елдің амандығын бәрінен жоғары қоятын азаматтар. Сол ер жүрек мамандарға да шынайы алғысымды білдіремін. Сондай-ақ, оқыс жағдайларға үнемі дайын болу мақсатында, қажетті қауіпсіздік техникалары кезең-кезеңімен толықтыру тұрақты назарда болатынын да баса айтқым келеді, — деді аймақ басшысы.
Аталмыш шара соңында ТЖМ басшысы мен облыс әкімі «Таза Қазақстан» республикалық экологиялық акциясы аясында қалалық құтқарушылар алаңына шыршаның жас көшеттерін отырғызды.
Әйгерім СӘРСЕНҚАЛИ,
«Жаңа уақыт»