Қазақстанның үздік ауылдық мектептерінің тізіміне Абай облысы Бородулиха ауданы Ы.Алтынсарин атындағы орта мектеп кірді. Бұл туралы облытсқы білім басқармасының баспасөз қызметі хабарлады.
2023-2024 оқу жылындағы жалпы білім беру пәндері бойынша оқушылар арасындағы ресубликалық олимпиаданың қорытынды кезеңіне 590 білім беру ұйымынан 1636 оқушы қатысты. Оның ішінде 191 оқушы — ауыл мектептерінен. Олимпиада қорытындысы бойынша 16 оқушы жүлделі орындарға ие болды және республикадағы ең үздік 14 ауыл мектебінің тізімі жасалды, оған Абай облысының Ы.Алтынсарин атындағы орта мектебі де кірді.
Бұл мектептің оқушылары бірнеше рет 2022-2023 және 2023-2024 оқу жылдарында облыстық және республикалық олимпиадалар мен конкурстардың жүлдегерлері атанды. Мектеп түлектері Юлия Германова, Қарақат Төлеухан және Максим Семенов соңғы екі жылда жалпы білім беретін пәндер бойынша олимпиадалар мен конкурстарда жүлделерге ие болған.
«Юлия Германова, өзге ұлт өкілі болса да, мемлекеттік тілді республикалық деңгейде екі мәрте асқақтатты. 2022-2023 оқу жылында ол қазақ тілі мен әдебиеті олимпиадасының республикалық кезеңінде 3-орынға ие болса, 2023-2024 оқу жылында ауыл мектептерінің оқушыларына арналған қоғамдық-гуманитарлық бағыттағы жалпы білім беретін пәндер бойынша республикалық олимпиадада І дәрежелі диплом алып, өз нәтижесін жақсартты. Сонымен қатар ол Семей қаласының Шәкәрім атындағы ректорлық грант иегері атанды.
Сондай-ақ 2024 жылы сол ауданның Жерновка орта мектебінің оқушысы Петр Фольмер ауыл мектептеріне арналған жалпы білім беретін пәндер бойынша олимпиаданың республикалық кезеңінің қорытындысы бойынша Астана қаласының халықаралық университетінде оқуға грант алғанын атап өткен жөн.
Абай облысы өз оқушыларын және олардың өңірдің білім беру әлеуетін нығайтуға ықпал ететін жетістіктерін мақтан тұтады,- делінген Абай облысы білім басқармасының баспасөз қызметі таратқан ақпаратта.
Өз тілшіміз 
