Биыл Екінші дүниежүзілік соғыстың аяқталып, жеңіс туының желбірегеніне 80 жыл толады. Соғысқа қазақ елінен 1 366 000 сарбаз аттанып, 601 029 боздақ кебінсіз майдан даласында қалды. Осылай халқымыз «Жеңіс» деген бірауыз қуанышты сөзге миллиондардың жанын айырбастады.
80 жыл – екі-үш буын алмасып, көненің орнын жаңа басар мерзім. Майдан даласында қан кешіп, қантөгісті көзбен көрген батырларымыздың дені «келместің кемесіне» мініп, мәңгілік мекенге қоныс аударды. Соғыс уағында тылдағы ауыр жұмыстың қамыты мойнын қажаған ата-әжелеріміздің де қарасы сетінеп, сол бір ауыртпалықты жылдарды өздерімен бірге әкетіп жатыр. Десе де тарихтан сабақ алу, оған жаңа заман көзімен баға беру күн тәртібінен түспек емес. Бабалар ерлігі – жас ұрпаққа үлгі-өнеге.
Ұлы Отан соғысындағы Жеңістің 80 жылдығына орай елімізде ауқымды шаралар ұйымдастырылуда. Оның ішінде спорттық шаралар да бар. Бородулиха ауданында түрлі деңгейдегі жарыстар кең ауқымда өтіп жатыр. 11 сәуір күні Новопокровка ауылының Мәдениет үйінде мүмкіндігі шектеулі азаматтар арасында шахмат және дойбыдан аудандық жарыс өтті. Іс-шараны аудандық мәдениет және тілдерді дамыту бөлімі, дене шынықтыру және спорт бөлімі, жұмыспен қамту және әлеуметтік бағдарламалар бөлімі Новопокровка ауылдық округінің мәдени-қоғамдық құрылымдарының қолдауымен ұйымдастырды.
Турнирге ауданға қарасты ауылдардан келген қатысушылар мен ауылдық округ мамандары белсенді қатысты.
Жарыстың салтанатты ашылуында Новопокровка ауылдық округінің әкімі, AMANAT партиясы аудандық филиалының атқарушы хатшысы және аудандық Ардагерлер кеңесінің төрағасы сөз сөйлеп, қатысушыларға сәттілік тіледі.
Қонақтар үшін ауылдық мұражайға экскурсия ұйымдастырылды. Мұнда соғыс жылдарындағы жерлестеріміздің ерлігі еске алынып, тарихи жәдігерлермен танысу мүмкіндігі туды.
Жарыс қорытындысында үздік ойыншылар грамоталармен, медальдармен және естелік сыйлықтармен марапатталды.
Ай-Көркем МАҚЫШ,
«Жаңа уақыт»
