50 жылда не еңсерілді, қандай жетістіктерге қол жеткізілді? Жарты ғасыр ішінде қаншама шәкірт мектепті тәмамдады, қаншама оқиғалар орын алып, қуанышты сәттер болды! Мерейтой әрқашан өмір сүрген уақыт кезеңінің қорытындысы саналады.
7 сәуір күні Переменовка орта мектебінде мектептің 50 жылдық мерейтойына арналған мерекелік іс-шара өтті. Қазақстанның түкпір-түкпірінен және шетелден көптеген қонақтар келді. Қонақтарды құрметпен қарсы алып, әрқайсысына мектеп оқушыларының қолымен жасалған, түрлі түсті гүл шоқтары сыйға тартылды.
Мерейтой аясында келушілер назарына түрлі көрмелер ұсынылды. Мәселен «Шебер қолдар» көрмесіне балалардың қолынан шыққан шығармашылық қолөнер бұйымдары, «Біз және спорт» көрмесіне оқушылардың аудандық, облыстық, республикалық жарыстардағы, спорттағы жетістіктері – медальдары, дипломдары мен кубоктары қойылды. «Біздің оттың ұшқындары» көрмесі студенттер мен мұғалімдердің зияткерлік сайыстардағы, байқаулардағы, олимпиадалардағы нәтижелеріне, сондай-ақ мұғалімдердің облыстық және республикалық журналдардағы жарияланымдарына арналды.
Бұл күні мұражай да есігін айқара ашты, онда мектеп түлектері туралы материалдар дайындалып, альбомдарға орналастырылды. Экскурсоводтар ауылдың тарихы, оның дамуына үлес қосқан қарапайым жандар мен атақты азаматтар, Екінші дүниежүзілік соғысқа қатысушылар және тыл еңбеккерлері туралы айтып берді.
Бұдан кейін оларға экскурсия ұйымдастырылды, әркім өз сыныбына барып, мектеп партасына отыруға, осылайша, қайтадан «оқушы кейпіне енуге» мүмкіндік алды, ал мектеп мұғалімдері сынып жетекшілері қызметін атқарды. Түлектерге сұрақтар қойылды, тақтаға шақырылды. Берілген есептерді шешіп, эксперименттер жүргізілді.
Жиын аясында мектеп әкімшілігі, облыстық Абай әлеуметтік даму басқармасының басшысы А. Садырбаев, Бородулиха ауданы әкімінің орынбасары Н. Жақсылықова, Бородулиха аудандық білім бөлімінің басшысы Н. Кукшебаева, Бородулиха аудандық ішкі саясат басқармасының басшысы М. Жайдарбеков, Бородулиха аудандық мәслихатының хатшысы С. Урашева, білім саласы қызметкерлері кәсіподақ филиалының төрағасы К. Даумбаева, Переменовка ауылдық округінің әкімі Қ. Қоңыров жылы лебіздерін білдіріп, мектептің көркеюіне, оқушылардың жаңа табыстар мен жеңістерге жетуіне, ұстаздардың жас ұрпақты тәрбиелеу жолындағы еңбектеріне тілектестіктерін білдірді.
Аудандық білім бөлімінен бір миллион теңгеге, Бородулиха ауданы әкімінің бес жүз мың теңгеге, кәсіподақ комитетінің төрағасынан елу мың теңгеге сертификаттар берілді, Абай облысының қоғамдық даму басқармасы Абай портреті мен оның кітаптарын, аудандық мәслихат хатшысы өз тарапынан кітаптарды сыйға тартты.
Салтанатты кеш соңында жүргізушілер қонақтарды арнайы жайылған мерекелік дастарханға шақырды, түлектер мектеп кезеңіндегі естеліктерімен бөлісті, өмір жолдарының қай арнаға бұрылғандығы, қандай қызмет атқаратындары туралы айтып, бір-бірін көрген кезде алған әсерлерімен, жаңалықтарымен бөлісті.
Оқу жылынан басталған «50 игі іс» акциясын жалғастырған түлектер баршаны мерейтоймен құттықтап, сыйлықтарын тарту етті. Осы акция аясында мектепке музыкалық орталық, қажетті құрал-жабдықтар, безендірілген 5 метрлік шырша, теледидар, тігін машиналары, принтер, экран және видеопроектор, шағын футболға арналған қақпалар, доптар, теннис ракеткалары, бастауыш сыныпқа арналған оқу жиһазы, мұғалімдерге арналған үстелдер, сыныптарға арналған перделер және т.б. сыйлады.
Қонақтар жылы лебіздерін арнап, жағымды эмоциялар сыйлап қана қоймай, ұстаздарға еңбекке деген құлшыныстары ешқашан жоғалмасын, шәкірттеріне деген сенімін жоғалтпасын, ал оқушылар арманға ұмтылудан жалықпасын деген тілектерін білдірді.
— Уақыт бөліп, туған мектебіне келген әрбір адамға үлкен алғыс айтамыз! «50 игі іс» акциясына қатысып, туған мектебіне игілікті іс жасауға үлес қосқан жандарға, демеушілік көрсеткен И. Шевченко, Б. Жаңақасов, А. Сурма, Е. Ертаев, Ю. Руденко, В. Николенко сынды азаматтарға, Мәдениет үйінің және дәрігерлік амбулатория ұжымдарына, Переменовка ауылдық округі әкімдігінің ұжымына, ізгі шаралардан шет қалмаған аудан тұрғындарына ризашылығымызды білдіреміз!, – деді Переменовка орта мектебінің ұжымы.
– 50 жыл бойы мұнда көптеген қабілетті де еңбекқор шәкірттер оқыды, білікті де білімді ұстаздар еңбек етті және әлі де еңбек етіп жатыр. Мектеп – ең маңызды және қажетті білімді беретін алтын ұя. Сондықтан, осы жерде білім нәрімен сусындаған барша түлек өмірден өз орнын тапсын. Мектебіміздің жұмысы алға басып, білім сапасы артып, табысты болсын. Әрдайым шәкірттері ізденімпаз, ұстаздары дарынды, материалдық-техникалық базасы заман талабына сай мектептердің қатарында болсын, – деді мектеп директоры Вера Балтабаева.
Сұлтан Ибрагимов
