«Таза Қазақстан» республикалық экологиялық акциясы аясында Бородулиха ауданында өзендер мен көлдердің айналасын қоқыстан тазартуға арналған «Мөлдір бұлақ» апталығы өтті.
Осы аптаның маңызды іс-шараларының бірі — «Өзендеріміз бен көлдерімізді таза ұстайық!» атты акция. Акция аясында Жерновка ауылдық округінің аумағында орналасқан Шүлбі су қоймасының жағалауы тазартылды.
Акцияға 200-ге жуық адам қатысты. Нәтижесінде Бородулиха ауданының тұрғындары барлығы 15 текше метр қоқыс жинап, шығарды. Бұл су қоймасының жағалау аймақтарының жағдайын едәуір жақсартуға және аймақтық табиғаттың экологиялық тазалығын сақтауға маңызды үлес қосуға мүмкіндік берді.
Еңбек ардагері Рыскүл Атаева «Өзендеріміз бен көлдерімізді таза ұстайық!» атты акциясы аудан тұрғындарын өз өлкесін таза ұстап, көркіне көрік қосу үшін бір мақсатқа жұмылдыратын маңызды шара екендігін тілге тиек етті.
Шараға белсене қатысып, экологиялық мәдениетті қалыптастыру және табиғатқа ұқыпты қарауды жауапкершілік санайтын ерікті жастардың бірі Николай Кусаинов та табиғатты аялаудың өзектілігіне тоқталды.
«Семей Орманы» резерватының қызметкерлері мұндай акцияларды үнемі өткізу нұр үстіне нұр болатынын айтты.
Осылайша, тазалық шаралары нәтижесінде су айдындары мен өзен, көлдер жағалаулары және арықтардың бойы тазартылды.
Өз тілшіміз 