Қазір қоғам түрлі қауіп-қатерге толы. Сол себепті де еліміз үшін қауіпсіздік басты мәселе ретінде белгіленген. Соңғы жылдары табиғи және техногендік сипаттағы төтенше жағдайлар да көбейіп кетті.
Бүгінде апаттың алдын алып, жедел қызмет сапасын арттыру мақсатында еліміздің арнайы мамандары түрлі жұмыстарды атқарып, қауіп-қатерді болдырмаудың әр түрлі жолдарын қарастыруда. Соған орай, осы жылдың 11 қыркүйегінде Бородулиха ауданында «Жер-2023» республикалық командалық-штабтық оқу-жаттығу шаралары шеңберінде жоғары дайындықтағы шұғыл ден қою жасағының жеке құрамы мен техникасына саптық тексеру жүргізілді. Сондай-ақ, тактикалық арнайы оқу-жаттығулары өткізілді, оның мақсаты – жойқын жер сілкінісі қаупі төнген және туындаған жағдайда қабылданатын шаралардың тиімділігін арттыру, төтенше жағдайды жою жөніндегі барлық іс-қимылдардың, сондай-ақ эвакуациялық іс-шаралардың үйлесімділігін жетілдіру, айтып келмейтін табиғи-техногендік апаттарға қашан да дайын болу керектігін ескере отырып, аудандағы азаматтық құтқару топтарының дайындығын, қажетті техникалары мен құрал-саймандарының жарамдылығын пысықтау.
Саптық байқауды аудан әкімінің орынбасары Ерлан Жұмабайұлы, Бородулиха ауданының ТЖБ бастығы, азаматтық қорғау подполковнигі Ержан Сүлейменов жүргізді. Оқу-жаттығу барысында аудандағы құтқару қызметтерінің жер сілкінісі мезгіліне дайындығы тексерілді.
«Жер-2023» республикалық командалық-штабтық оқу-жаттығуы аясында Бородулиха ауылының Абай атындағы орта мектебінің аумағында сейсмикалық жаттығулар өткізілді. Жаттығу барысында жер сілкінісі кезіндегі әрекеттер пысықталды. Жоспар бойынша «Баршаның назарына!» дыбыстық сигналы естілгенде объекті қызметкерлері азаматтық қорғау органдарын хабардар ете отырып, адамдарды ғимараттан эвакуациялауды бастайды. Ол үшін 15-20 секунд уақыт қарастырылған. Ғимараттан шыққан адамдар электр желілері мен ғимараттан қашықтықта орналасқан арнайы алаңға жиналғаннан кейін, орталық қызметкерлері пациенттердің бар-жоғын тізім бойынша тексеріп шығады. Ал дәрігерлер адамдарды қарап, жылы және қажетті заттармен қамтамасыз етуі керек.
Оқу-жаттығу Бородулиха ауданының ұйымдарының басшылары мен лауазымды адамдарының тәжірбиелік дағдыларын жетілдіру мақсатында ұйымдастырылды. Бұл шараға Бородулиха ауданының төтенше жағдайлар бөлімі, құқық қорғау органдары, жергілікті атқарушы органдар, коммуналдық қызмет, энергетика қызметі, медициналық қызмет, жол қызметі және азаматтық қорғау қызметі күштері қатысты.
Іс-шарада әрбір қызметтік топ жетекшісі мен мүшелерінен міндеттері сұралып, техникалық базалары тексерілді. Құрал-саймандары түгенделді. Өйткені, аудан айтып келмейтін апаттық жағдайларға барлық уақытта да дайын болуы керек. Оқу-жаттығу барысында тұрғындар мен мекемелердің, төтенше жағдайлар бөлімі қызметкерлерінің дайындықтарының қандай деңгейде екені тексерілді. Әрбір топ мүшелері өздеріне жүктелген міндеттері мен іс-қимылдарын жақсы біледі.
— Мұндай оқу-жаттығу жиындары жыл сайын жоспар бойынша өткізіліп тұрады. Ауданда төтенше жағдайлардың алдын алу шараларына дайындық жүргізіледі. Біз осы арқылы дайындықты пысықтаймыз. Бүгін қызметкерлеріміз өз істерін атқаруда жеделдік танытып, техникалық құрал-жабдықтардың жарамды екенін көрсетті. Оқыс жағдай бола қалған жағдайда, сақадай-сай болуымыз қажет. Оқу-жаттығу өз дәрежесінде өткізілді, — дейді Бородулиха ауданының ТЖБ бастығы, азаматтық қорғау подполковнигі Е. Сүлейменов.
Сөз соңында айтарымыз, әрине, төтенше жағдаймен күресу қажет. Бірақ, оның алдын алған одан да тиімді болмақ. Ендеше, мұндай шаралардың маңызы да, тигізер септігі де мол.
Азамат Смагулов
