Облыс әкімі Нұрлан Ұранхаев Бородулиха ауданына қарасты Жаңа Шүлбі ауылындағы Арнаулы әлеуметтік қызметтерге мұқтаж балаларды қолдау орталығында болды. Сапар барысында аймақ басшысы мекеменің бүгінгі таңдағы жағдайымен танысып, қызметкерлердің ұсыныс-пікірлерін тыңдады. Сөз орайында орталық тәрбиеленушілермен де әңгімелесті.
Қазіргі күндері аталмыш мекемеде педагог-психолог кабинеттері, үйірме жұмысына арналған орындар, хореография, акт залы, медициналық пункт, жаттығу залы, сондай-ақ «Орман жиегі» деп аталатын жазғы сауықтыру алаңы жабдықталған. Сонымен қатар, тәрбиеленушілерді жан-жақты дамыту үшін орталықта 20-дан астам шығармашылық және спорттық бағыттағы үйірмелер мен секциялар да тұрақты түрде жұмыс жүргізеді. Ондағы мамандар балалардың таланттарын ұштап қана қоймай, әлеуметтік тұрғыдан бейімделуге де көмектеседі. Сол тәрізді орталық аумағында спорт және ойын алаңдары да бар.
Жалпы, аталмыш мекемеде бірқатар жұмыстар жүргізілген. Атап айтсақ, балалардың қауіпсіздігін қамтамасыз ету үшін бейнебақылау камералары орнатылған. Қазандық, кір жуатын орын, гараж, қоймалар жабдықталып, жарықтандыру жұмыстары жүргізілген. Орталықтың барлық аумағы толықтай қоршалыпты.
Мекемеде бүгінде 48 бала тәрбиеленуде. 26 педагог еңбек етеді. Жалпы, орталықтың 75 балаға дейін қабылдауға мүмкіндігі бар. Мұнда арнаулы әлеуметтік қызметтерге мұқтаж үш жастан 18 жасқа дейінгі балаларға, оның ішінде физикалық және психикалық дамуында шамалы ауытқулары бар балаларға кешенді қолдау көрсетіледі.
Нұрлан Телманұлы орталықтағы ұжым мүшелерімен кездесіп, тәрбиеленушілердің білім алуы мен өмір сүру сапасын жақсарту бойынша жүргізіліп жатқан жұмыстар жайында пікір алмасты. Саннан сапаға ерекше көңіл бөлу керектігін айтқан облыс әкімі балалардың қызығушылықтарын ескеріп, болашақтарына қажетті дағдыларға баулитын үйірмелер ашуды тапсырды. Ал облыстық білім басқармасының басшысына орталыққа әдістемелік көмек көрсетуді, ұжымдар арасында тәжірибе алмасуды жолға қоюды, аудан әкіміне балалардың қалаға саяхаттауына жағдай жасауды міндеттеді.
-Біз барлығымыз да бала тәрбиелеп отырмыз. Ал, осынау орталықтағы балалар ерекше қамқорлықты қажет етеді. Олар қоғамда өздерін еркін сезінулері үшін барлық жағдайды жасауымыз керек. Бұл балаларды болашақ өмірге бүгіннен бастап даярлау біздің ортақ міндетіміз, — деді өз сөзінде облыс әкімі.
Облыс әкімі орталыққа жасаған сапары барысында бокс секциясына қажетті жабдықтарды сыйға тартып, шаңғыға қажетті жиынтықтарды табыс етті.
Ай-Керім СӘРСЕНҚАЛИ,
«Жаңа уақыт» 