Биыл қазақтың бас ақыны, ұлы ойшыл, философ, қазақ жазба әдебиетінің негізін қалаушы Абай Құнанбайұлының туғанына 178 жыл толып отыр. Хакім Абайдың мұрасын тануға ұмтылған сайын ғажайып сипаттары ашыла беретіні анық. Абайды тану, жас ұрпаққа таныту – әрбір қазақтың міндеті.
10 тамыз күні Абай күніне орай, аудандық кітапханада жастар ресурстық орталығы жастарының қатысуымен қазақ жазба әдебиетінің негізін қалаушы, философ, композитор, данышпан-ойшыл, қазақ елінің ұлы ақыны, тамаша суреткер Абай Құнанбаевтың 178 жылдығына арналған «Кемеңгерліктің биік шыңы – Абай» атты білім сайысы өтті. Абай сөзі – халқымыздың рухын асқақтатып, еңсесін түзеген аталы сөз. Қазақ халқы ұлы ақынның мұрасы арқылы толысып өсті, Абайдың дана ойлары Қазақ елінің арқасында айдай әлемге таралды. Ұлы Абай шығармаларынан қазақ баласының салауатты тәрбие алып, ұлттық өсіп-өнуіне қажетті көптеген өсиет сөздерді табуға болады. Оның шығармалары мен қара сөздері қазақ халқын ғана емес, жалпы адамзат баласын екі ғасырдан бері рухани құндылықтарға жетелеуде. Абай даналығы жаңа ғасырда жаңарып түлеп, өркениетті мемлекет құрып жатқан қазақ халқының дамуына өлшеусіз зор ықпал жасауда.
Іс-шараның негізгі мақсаты – жастардың бойына ақыл мен парасатты, сөз құдіреті мен көркем сөздің мәйегін сіңдіру. Ұлыларымызды құрметтеу, сол арқылы жастардың бойында мақтаныш сезімін ояту, даналардың даралығын бағалау, қастерлей білуге баулу, ұлы Абайдың мол мұрасын насихаттау.
Сайыс бес кезеңнен тұрды. Әділқазылар алқасы құрамында Бородулиха ауданының мәдениет, тілдерді дамыту, дене шынықтыру және спорт бөлімінің басшысы И. Бельская, әдістемелік кабинетінің басшысы А. Тюленева, мемлекеттік қызмет ардагері Р. Атаева болды.
Қатысушылар «Сегізаяқ», «Тұлпар», «Абай ұрпақтары» атты үш топқа бөлініп, ақынның өмір жолы, шығармашылығы, аудармалары мен артына қалдырған мол мұрасы жайлы түрлі тапсырмаларды орындап, Абай өлеңдері мен қара сөздерін жатқа оқыды, қойылған сұрақтарға да қатысушылар мүдірмей жауап берді.
Төрт кезеңнің қорытындысы бойынша екі команда финалға өтті. Қарсыласынан басым түскен «Тұлпар» командасы жеңіске жетті. Барлық жеңімпаздар бағалы сыйлықтармен марапатталды.
Б. Қаймолданова,
кітапханашы 
