«Қоғамның даму барысын өмірде нәзік, көңілде биік, ал, істе мығым әйелдер қауымынсыз елестету мүмкін емес», әрине. Бүгінде нәзік жандыларымыз ұрпақ тәрбиелеумен қатар, әр салада табысты еңбек етіп жүр.
«Әлемдегі ең сұлу – қазақ әйелі: менің жарым, менің анам, менің қызым. Қазақты қазақ қылған осы әйел болатын, сұлу ғана емес, сымбатты, мінезді, ақылды, адал жар, абзал ана, ағайынға қамқор, ауыл-аймаққа құт, ердің мақтаны, елдің көркі»,-деп жазушымыз Мұхтар Мағауин суреттегендей, «қазақ әйелі» атына лайықты жандардың бірі – «АМАNАТ» партиясы Бородулиха аудандық филиалының төрағасы, Бородулиха аудандық мәслихатының төрағасы Сәуле Урашева.
1964 жылы Ақсуат ауданында өмірге келген Сәуле Тұрсынқызы 1986 жылы Семей педагогикалық институтын «Орыс тілі мен әдебиеті» мамандығы бойынша бітірген.
Еңбек жолын Үржар ауданы Науалы ауылында мұғалім болып бастаған ол әр жылдары Бородулиха ауданының Камышенка ауылында балабақша меңгерушісі, Бородулиха ауданы әкімінің орынбасары, Жезкент, Новая Шульба және Камышенка ауылдарының әкімі қызметтерін атқарған.
Бүгінде «АМАNАТ» партиясы Бородулиха аудандық филиалының төрағасы, VIII шақырылған Бородулиха аудандық мәслихатының төрағасы.
Саналы ғұмырын мемлекеттің дамуына арнаған жанның еңбегі еленіп, бірқатар мерейтойлық медальдармен, «Белсенді қызметі үшін» төсбелгісімен, Қазақстан Республикасы Президентінің алғыс хаттарымен, облыс, аудан әкімінің грамоталарымен марапатталған.
Әйелдер жүрген жерде әрдайым адалдық, объективтілік пен алға ұмтылу бар. Жеке бас мәселесінен гөрі үнемі мемлекет мүддесін жоғары қоятын Сәуле Тұрсынқызы лауазымды қызметтерін абыроймен атқарып келеді. Әріптестерінің айтуларынша, шұғылалы көктемдей маңайына шуақ шашып, үнемі мейірімін төгіп жүретін аяулы жан тиянақтылық пен тәртіпті қатаң сақтап, өзіне де, өзгеге де талап қоя біледі. Осы қасиеттерінің арқасында аудан тұрғындарының алдында өзіндік беделін қалыптастырды. Кейіпкеріміздің айтуынша, әйелдің бақыты болуы мен қызметте жетістікке жетуі тікелей отбасына байланысты.
-Бақытты әйел — бауырында баласы, арқасүйер азаматы бар әйел. Үйдегі береке әйелді жетістікке жетелейді. Әрбір арудың басты мұраты – өмірге перзент әкеліп, ана атану. Саналы ұрпақ тәрбиелеп, олардың жетістіктерін көру. Нәзік жандылардың барлығы бақытты болуға лайықты, — деген Сәуле Тұрсынқызы отбасында аяулы жар, асыл ана.
Ел дамуы жолында қалтқысыз қызмет етіп жүргенін үйдегі отағасының қолдауымен байланыстырып, «Үйдегі береке ғана әйелді жетістікке жетелейді» деген сөзінің артында үлкен салмақ жатқанын түсіндік. Бұл да қазақ анасына тән биязылықтың, даналықтың бір үлгісі деп ұқтық.
— Көктемнің шұғылалы мерекесі қарсаңында барлық нәзік жандылардың асыл ана, аяулы ару деген мәртебелі атқа кір келтірмей, ауданымыздың, облысымыздың дамуына үлес қосуларын тілеймін. Халқымызда алтынның арқауындай, күмістің жалғауындай болған нәзік жандыларымыз, өз елінде бейбіт ғұмыр кешсе деймін. Бүгінгі қоғамда салиқалы әйелдің саналы ғұмырының ұлт келешегінің, тіпті, әлем болашағының баянды болуына тигізер үлесі орасан зор,- деді сөз соңында Сәуле Урашева.
Әйгерім СӘРСЕНҚАЛИ,
«Жаңа уақыт»