«Транс ЭКО Сервис» ЖШС-нің Жезкент кентінде қатты тұрмыстық қалдықтарды шығару қызметін 1 маусымнан бастап тоқтататыны туралы ресми хабарламасына байланысты кеше Бородулиха ауданының әкімдігінде аудан кімі Айдар Ибраевтың төрағалығымен кеңес отырысы өтті.
Кеңес аудан прокуратурасының, тұрғын үй-коммуналдық шаруашылық, жолаушылар көлігі және автомобиль жолдары бөлімінің аудан әкімінің орынбасарларының, Жезкент кенті әкімінің және әлеуетті жаңа қызмет көрсетуші компания өкілдерінің қатысуымен өтті.
Кеңес барысында қатты тұрмыстық қалдықтарды жинау мен жоюдың бірыңғай жүйесін қалыптастыру жұмысы жүйелі түрде жүргізіліп жатқандығы тағы да атап өтілді. Жаңа полигон салуға жер телімін бөлу бойынша жер комиссиясының шешімі қабылданды. Қазіргі уақытта тиісті жерге орналастыру құжаттары дайындалуда. Одан кейін жобалық-сметалық құжаттаманы әзірлеу кезеңі басталады. Бұл – уақытты талап ететін, кезең-кезеңімен іске асырылатын жүйелі жұмыс.
-Атап өтетін жайт — осы жылдың сәуір айында «Транс ЭКО Сервис» ЖШС өкілдері Жезкент кентіндегі азаматтарды жеке қабылдау кезінде бұл мәселені алғашқылардың бірі болып көтерген болатын. Содан бері полигон орналастырудың тиімді нұсқаларын қарастыру және қажетті құжаттарды әзірлеу бағытында жоспарлы жұмыс басталды. Қоқыс шығару қызметі тоқтамайды. Алдағы уақытта қалдықтарды шығару бойынша жаңа қызмет көрсетушіні анықтау үшін конкурс жарияланатын болады. Қалдықтарды тұрақты және үздіксіз шығару – әрбір тұрғынның жайлылығы мен тұрмыстық қауіпсіздігі үшін маңызды. Сол себепті бұл мәселені жүйелі шешу үшін бар күшімізді саламыз,- деді Айдар Маратұлы.
Өз тілшіміз 