Өткен аптаның соңында Бородулиха ауданының әкімі Айдар Ибраев Бородулиха аудандық ауруханасының бас дәрігері Марат Қосамбековпен және Белағаш ауылдық округінің әкімі Мақсұт Мүбаракұлы Габдуллинмен бірге аталмыш елді мекендегі фельдшерлік-акушерлік пунктке жүргізіліп жатқан күрделі жөндеу жұмыстарының барысын тексерді.
Айта кету керек, осынау әлеуметтік нысан біраз жылдан бері күрделі жөндеу жұмыстарын қажет етіп тұрған болатын. Жергілікті тұрғындардың тілек-өтініштеріне орай жаңарту жұмыстары қызу қарқынмен басталып кетті.
Қазіргі уақытта аталмыш ғимаратта демонтаж жұмыстары қарқынды түрде жүргізілуде, ал мердігер ұйым құрылыс-монтаж жұмыстарына кідірместен кірісіп кеткен. Жөндеу жұмыстарын «Kaz Строй Арсенал» ЖШС орындауда.
Айта кетер жайт, бұл – Белағаш ауылы мен оған іргелес жатқан елді мекендердің тұрғындарына алғашқы және маңызды медициналық көмек көрсететін бірегей мекеме болғандықтан, жөндеу жұмыстарының сапалы әрі мерзімінде орындалуы аса маңызды. Бұл бағыттағы атқарылып жатқан шараларды аудан әкімі Айдар Маратұлы тікелей өз бақылауына алған. Аталмыш нысандағы жүргізіліп жатқан жұмыстар барысымен танысқан өңір басшысы мердігер мекеме өкілімен тілдесіп, жұмысты уақытында әрі сапалы аяқтауды баса тапсырды. Қажет жағдайда аудандық әкімдік тарапынан тиісті деңгейде қолдау мен көмек те көрсетілетін болады. Бастысы – нысан толықтай талапқа сай болуы тиіс. Және көп кешікпей қабылдауға келген тұрғындарға толыққанды түрде медициналық көмек көрсетуі қажет.
Сөз орайында айта кетелік, биылғы жылы Бородулиха ауданының бірнеше ауылдық округінде медициналық нысандарға күрделі жөндеу жүргізіледі. Атап айтқанда, Зенковка, Новопокровка және Петропавловка ауылдарындағы дәрігерлік амбулаториялар да жөндеу жүргізу жоспарына енгізілген. Бұл шаралар ауылдық денсаулық сақтау жүйесін жаңғырту аясында жүзеге асырылып жатыр.
Сондай-ақ сапар барысында аудан әкімі Белағаш ауылындағы ауылдық клуб ғимаратын дааралап, онда жұмыс жүргізіп жатқан мердігер өкілдерімен кездесті. Сонымен қатар, жөндеу жұмыстарының барысы, туындап отырған мәселелер және алдағы уақыттардағы жоспарлар жөнінде кеңінен пікір алмасты.
Атал ауыл тұрғындарының өмір сүру сапасын жақсарту бағытындағы жұмыстар әлі де жүйелі түрде жалғаса беретін болады.
Әйгерім СӘРСЕНҚАЛИ,
«Жаңа уақыт»