Өткен аптаның соңында Семей қаласында Абай өңіріндегі ауыл шаруашылығы қызметкерлерінің форумы болып өтті. Аталмыш жиын барысында өңірдің агроөнеркәсіп кешенінің дамуы қорытындыланып, алдағы жылдардың жоба-жоспарлары да белгіленді.
Басқосуда құттықтау сөз сөйлеген облыс әкімі Нұрлан Ұранхаев бүгінгі таңда ауыл шаруашылығы қызметкерлерінің ерен еңбегінің арқасында өңірдің экономикалық тұрақтылығы мен әл-ауқаты жыл санап артып келе жатқанын баса атап өтті.
-Абай облысы — экономикасының негізгі бөлігін аграрлық сектор құрайтын аймақтардың бірі саналады. Агроөнеркәсіп саласында оң өзгерістер орын алып, өнім көлемі арттуда. Өндіріске жаңа технологиялар енгізіліп, тиімділікті арттыруға бағытталған қадамдар жасалуда. Бұл, әрине осы залда отырған, ата кәсіппен шұғылданатын өздеріңіздің еңбекқорлықтарыңыз бен жоғары кәсібиліктеріңіздің арқасында мүмкін болғанын ерекше атап өту қажет, — деді бұл орайда аймақ басшысы.
Жалпы, биылғы жылдың 10 айының қорытындысы бойынша облыс диқандары айтарлықтай табысқа жетті. Ауыл шаруашылығы өнімдерінің жалпы көлемі 335,9 млрд теңгені құрап отыр. Әсіресе, мал шаруашылығында 110,7 пайыздан астам өсім байқалды. Шаруалар мемлекет қолдауын айқын сезініп келеді.
Биыл агроөнеркәсіп кешенін субсидиялауға 17,5 млрд теңге бөлініп, 2 мыңнан астам ауыл шаруашылығы тауар өндірушілерін қолдауға мүмкіндік туған.
-Мал шаруашылығы саласындағы 10 айдың қорытындысы бойынша тірі салмақтағы барлық түрдегі ет және сүт өндірісінің өсуі тиісінше 102,8% және 102,6% құрады, — деді бұл орайда форум барысындағы баяндамасында облыстық Абай облыстық ауыл шаруашылығы басқармасының басшысы Ертай Қуанбаев.
Осы орайда айта кетер бір жайт, бүгінгі таңда Бородулиха ауданы бойынша дәнді дақылдарды жинау толық аяқталды. Жалпы көлемі 165,6 мың га егістік алқаптың орташа өнімділігі гектарына 14,8 центнерді құрады. Бұл үлкен көрсеткіш.
Форумда жетістіктер мен жоспарлар ғана талқыланып қоймай, сонымен қатар ауыл шаруашылығының үздік қызметкерлері де марапатталды. Бұл орайда Бородулиха ауданынан ІІІ дәрежелі «Еңбек Даңқы» орденімен «Труд» шаруа қожалығының механизаторы Александр Андрейцев, «Еңбек ардагері» медалімен «Витязь» шаруа қожалығының басшысы Владимир Майер, Абай облысы әкімінің алғыс хатымен «Лазарев и К» ЖШС механизаторы Александр Донов салтанатты түрде марапатталды.
Бұл сөз жоқ жерлестеріміздің аудан мен облыстың ауыл шаруашылығын дамытуға қосқан үлестері зор екендіктерін айғақтайды.
Барша марапат иелеріне зор денсаулық, бақыт, өркендеу және жаңа табыстар тілейміз!
Өз тілшіміз