1 сәуірден бастап Бородулиха ауданында елді мекендерді абаттандыру және көгалдандыру бойынша екі айлық сенбілік шаралары басталды. Осы маңызды іске ауданның әрбір тұрғыны, сондай-ақ кәсіпкерлік өкілдері де белсене атсалысуы тиіс.
Ол жайында аудан әкімі Айдар Ибраевтың төрағалығымен өткен жұмыс кеңесінде айтылды.
Кеңес ашық пікір алмасу форматында өтіп, ауылдық округтердің әкімдіктері, мекемелер мен түрлі меншік нысанындағы ұйымдар алдында тұрған міндеттер мен ұсыныстар талқыланды.
Атап айтсақ, 1 сәуір мен 1 маусым аралығында ауданда сенбіліктер, санитарлық тазалық күндері, көгалдандыру және тәртіп орнату жұмыстары жүргізіледі. Негізгі назар — жолдар мен тротуарларды, аялдамалар мен ғимараттардың қасбеттерін, шағын сәулеттік нысандарды тазартуға аударылады.
Сонымен қатар, аудан ауылдары арасында абаттандыруға арналған байқау өткізу жоспарланып отыр. Бұл бастама ауыл тұрғындарын ортақ іске жұмылдырып, туған жердің тазалығы мен көріктілігін арттыруға ынталандыру құралына айналатын болады. Осы ретте Айдар Маратұлы аудан тұрғындарын, кәсіпкерлер мен мекеме ұжымдарын белсенді қатысуға шақырды.
— Бірлесе отырып, көшелер мен аулаларымызды, қоғамдық орындарды таза, жайлы әрі көрікті етіп ұстау – бәріміздің ортақ міндетіміз. Мемлекет басшысы Қасым-Жомарт Тоқаев: «Тазалық алдымен әдетке, кейін ұлттың қасиетіне айналуы керек. Себебі, өркениетті елдің басты белгілерінің бірі — тазалық пен тәртіп», — деп атап өткен болатын. Сондықтан, бейжайлық танытпай, әрқайсымыз өз ауламызды, көшемізді, ортақ пайдаланатын орындарды ретке келтіріп, ағаштар мен гүлдер отырғызып, орындықтар мен қоқыс жәшіктерін жаңартып, ғимараттардың келбетін ретке келтірейік.
Аудандағы кәсіпкерлерге ерекше үндеу жолдағым келеді. Сауда нысандарының айналасын абаттандырып, гүлзарлар орнатып, жарықтандыру жүйесін қамтамасыз етіп, тазалықты сақтауға атсалысуларыңызды сұраймын. Бұл ауылымыздың ажарын ашып, тұрғындар мен қонақтар үшін қолайлы орта қалыптастырады. «Таза Қазақстан» бастамасын науқан ретінде емес, өмір салтына айналдырайық. Тек бірігіп әрекет етсек қана, туған өлкеміздің тазалығы мен әдемілігін сақтай аламыз, — деп атап өтті өз сөзінде аудан әкімі Айдар Ибраев.
Әйгерім СӘРСЕНҚАЛИ,
«Жаңа уақыт»