Облыс орталығында Қазақстан халқының бірлігі күніне орай «Бір шаңырақ астында» атты дөңгелек үстел өтті. Басқосуға Қазақстан халқы ассамблеясының, этно мәдени, қоғамдық бірлестіктер, мемлекеттік емес ұйымдар, облыстық аналар кеңесінің мүшелері, партия жетекшілері, түрлі сала мамандары, жастар мен еріктілер қатысты.
Дөңгелек үстелде аймақ басшысы Нұрлан Ұранхаев жиналғандарды мерекемен құттықтап, бұл бір шаңырақ астына жиналған ұлт пен ұлысқа ортақ мереке екенін атап өтті.
-Ел бірлігі – елдігіміздің арқауы, тәуелсіздігіміздің тірегі. Біз – барды бағалап, иыққа түскен жүкті бірге көтерумен келеміз. Ел басына күн туып, ер етікпен су кешкен небір заманда да шаңырағымыз шайқалған жоқ. Себебі – күшіміз бірлікте. Биылғы көктемнің сынағын да, жұрт болып жұмылып, ел болып еңсереміз, — деді облыс әкімі.
Басқосуда мемлекеттік тілді дамыту, ел бірлігі, өңірімізді көркейту, көгалдандыру мәселелері де әңгіме арқауына айналды.
Жиын соңында тасқын кезінде азаматтық позициясын танытып, зардап шеккендерге қол ұшын созған 40-қа жуық азамат облыс әкімінің Алғыс хаты мен естелік сыйлықтарына ие болды. Олардың арасында Бородулиха ауданынан «Луговое»шаруа қожалығының басшысы Құмар Ғалиев, «Р.Г. Садықов» жеке кәсіпкерлігінің иесі Асхат Садықов, Бородулиха ауылы әкімі аппаратының жүргізушісі Михаил Тамилов бар.
Ай-Керім СӘРСЕНҚАЛИ,
«Жаңа уақыт»