Жастар мен жасөспірімдердің әскери өмірге қызығушылығы жылдан-жылға артып келеді. Осы орайда, әскери-патриоттық сайыстар өскелең ұрпақты отансүйгіштікке тәрбиелеуге, олардың болашақта Отан қорғауға әзірліктерін пысықтауға, жалпы, әскери саланың тәртібі мен жинақылығына бейімдеуге зор ықпалын тигізеді.
Бородулиха ауданының білім бөлімі мен қорғаныс істері бөлімінің басшылығымен Әлихан Бөкейхан атындағы қазақ орта мектебінде «Айбын-24» әскери-қолданбалы спорт түрлері бойынша аудандық жарыс өтті. Жарысқа 4 әскери-спорт клубына біріктірілген 13 мектеп қатысты.
Балалар дене шынықтыру дайындығы мен патриоттық рухын көрсете отырып, тартылу, ату, автоматты құрастыру-бөлшектеу, әскери эстафета және басқа да сайыс түрлерінен жарысты.
Жарыста Бородулиха ауылының «Мерген» әскери-спорттық клубы жеңіс тұғырынан көрінсе, жезкенттің «Жеңіс» клубы екінші орынды жеңіп алды. Новошульба ауылының «Вымпел» клубы үшінші орын алды.
Еліміздің егемендігі, ішкі тұрақтылығы болашақта осы өрімдей жастарға сеніп тапсырылатындығын, Отан қорғау нағыз ердің ісі екендігін ескерсек, патриоттық рухты көтеретін мұндай сайыстардың берері мол.
Ай-Керім Сәрсенқали,
«Жаңа уақыт» 
