Тіршілікті түлетіп, табиғатқа жан бітіретін Наурыз – біздің төл жаңа жылымыздың бастауы, жаңғыру мен жаңа өмірге ұмтылудың нышаны. Мазмұны байып, кең көлемде тойланып жүрген Ұлыстың ұлы кұнін Бородулиха ауданының тұрғындары да ерекше атап өтуде.
14 наурыз күні «Елден сәлем!» фестивалі аясында Көкпекті ауданының басшылығы мен өнерпаздары Бородулиха ауданына келді. Дәстүрді, өнерді, халық шығармашылығын және іскерлік бастамаларды тоғыстыратын шара Көрісу күні мерекесімен тұспа-тұс келді.
Мәдени бағдарлама аясында қонақжай бородулихалықтар Көкпектіден келген құрметті меймандарды күтіп алып, көрісіп, Наурыз мерекесімен құттықтады.
Мәдениет үйінде ұйымдастырылған концертте көкпектілік өнерпаздар әсем әнімен, мың бұралған биімен, күмбірлеген күйімен аудан тұрғындарына мерекелік көңіл күй сыйлады.
Концерт соңында Бородулиха ауданы әкімінің орынбасары Қайрат Сапоров құттықтау сөз сөйлеп, шоқтығы биік мәдени шара үшін Көкпекті ауданы әкімінің орынбасары Аслан Танысбаевқа алғыс хат табыстады. Сондай-ақ тараптар бір-біріне естелік сыйлықтар тарту етті.
Сонымен қатар, «Наурызнама» онкүндігіне орай ауылдық округтерде, мекемеер мен ұйымдарда халқымыздың мәдениеті мен салт-дәстүрін, әдет-ғұрпы мен қоғамдық құндылықтарын айшықтайтын шаралар ұйымдастырылуда.
Ай-Керім Сәрсенқали,
Жаңа уақыт