Ақпан айының екінші онкүндігіне де аяқ бастық. Облыс әкімі Нұрлан Ұранхаев күн жылынып, қар көбесі сөгілгенін күтпей, көктемгі тасқын судың алдын алу жұмыстарын күшейтуді тапсырған.
Бородулиха ауданында көктемгі су тасқынының алдын алуға бағытталған кешенді жұмыстар жүргізіліп жатыр. Өткен жылдың соңында арықтар мен өзен арналары қатты қалдықтар мен шөптерден тазартылып, бірнеше су өткізу көпірлері ауыстырылған. Қазіргі таңда қауіпті аймақтардан қар шығару жұмыстары тұрақты түрде жүргізілуде.
Жуырда аудан әкімдігінің мәжіліс залында аудан әкімі Айдар Ибраевтың төрағалығымен дербес бөлім басшыларының, төтенше жағдайлар бөлімі өкілдерінің, ұйымдар мен мекеме қызметкерлерінің қатысуымен алқалы жиын өтті. Жиында алдағы су тасқыны кезеңіне дайындық мәселелері қаралып, алдын алу шаралары талқыланды.
Дренаждық арналарды тазарту, бөгеттерді нығайту және төтенше жағдайлар қызметінің дайындығын қамтамасыз ету маңызды міндет болып қала береді. Аудан тұрғындарының қауіпсіздігі әкім назарында.
Өз тілшіміз 