Жаз айларында өрттің өршу қаупі жиілеп, орасан шығынға ұшыратып жатады. Жедел әрекет ете білген жағдайда, қызыл жалынның бетін қайтаруға мол мүмкіндік туатыны анық. Күнделікті тұрмыста кез келген тұрғын сақтық шарасын назарда ұстауға міндетті.
Негізгі функционалдық бағыт бойынша жоспарлы қадамға барудың нәтижесінде, қауіпсіздік деңгейі жоғарылап, халықтың дер кезінде әрекет ету іс-қимылы пысықталады. Жалпы төтенше жағдай орын алған жағдайда, өрт сөндірушілердің толық құрамы мен құрал-жабдықтары түгел болуы тиіс. Қарапайым тәжірибенің өзі көрсеткендей, ауқымы кең өрт шалған жағдайда, ауданнан қосымша күш жеткенше, оны сөндіру мүмкін болмай жатады. Мұндайда жан-жақты жұмыс көзін онтайландыру маңызды. Төтенше жағдай орын алған тұста ауыл ішінен арнайы жасақталған бригада дереу іске көшеді.
11 қарашада Новопокровка ауылдық округінде Новопокровка ауылдық округінің өрт сөндіру бекетінің ашылуы салтанатты өтті. Әрине, ауылдық жерде құрылған шағын өрт сөндіру бекетінің үлкен өрт ошағын толықтай құрықтауға шамасы жетпес. Алайда, табиғат апатының алдын алып, өрт екпінін тежеуге сеп болары сөзсіз.
Өрт сөндіру бекетінде жылытылатын көлік тұрағы орналасқан. Екі қызметкер және бір өрт сөндіру автокөлігі бар. Жаңадан құрылған команда тек өртті сөндіріп қана қоймай, сонымен қатар, аумақтағы өзге де төтенше жағдайларды жоюға қатысады, қиын жағдайға тап болған адамдарға, халыққа көмек көрсетеді.
Іс-шараға облыстық ТЖ департаменті басшысының міндетін атқарушы, Абай облысының азаматтық қорғау полковнигі Алексей Штыкель және Бородулиха ауданы әкімінің орынбасары Мағжан Табылдин қатысып, өрт сөндіру бекетінің іске қосылуы өрт оқиғалары болған жағдайда, олардың жедел түрде ауыздықталуына мүмкіндік беретінін, бұл ретте, дер кезінде белсенді әрекет етуді ұйымдастыру қажеттігін тілге тиек етті.
1950 жылы Новопокровка ауданының орталығында өрт сөндіру бекеті ашылды. Александр Кривнев бұл мекеменің бірінші басшысы жемісті еңбек еткен. Өрт сөндіру бекетінің ашылуына орай, зил 150 бір өрт сөндіру машинасы бөлінді, сондай-ақ, колхоз екінші газ 66 өрт сөндіру машинасын сатып алды. Өрт сөндіру бекетінде 2 отряд жұмыс істеп, Петропавловка, Новопокровка, Зубаир сынды үш елді мекеніне қызмет еткен екен. 1995 жылдан бастап, колхоз таратылғаннан кейін өрт сөндіру бекеті де жұмысын тоқтатты. Сол кезден бастап, бүгінгі күнге дейін бұл ғимарат бос тұрды және өрт сөндіру бекеті тұрғындардың жадында тек естелік ретінде сақталды.
ТЖ департаменті басшысының міндетін атқарушы, Абай облысының азаматтық қорғау полковнигі Алексей Штыкель мен Бородулиха ауданы әкімінің орынбасары Мағжан Еренғайыпұлы, сондай-ақ, «Лада» шаруа қожалығының басшысы Анатолий Романов, округ әкімі тұрғындарды өрт сөндіру бекетінің ашылуымен құттықтап, оның жеке құрамына қызметтік міндеттерін жауапкершілікпен атқаруға, өрт сөндіру-құтқару қызметінің беделін көтеруге тілектестіктерін білдірді.
Ауыл тұрғындары да жаңа бекеттің ашылуына орай, шынайы ризашылықтарын жеткізді. Себебі, бұл округтің жақын маңда орналасқан елді мекендерінде де тұрғындардың қауіпсіздік деңгейін айтарлықтай арттыруға мүмкіндік береді.
Сұлтан ИБРАГИМОВ 
