Адам өмірінде ең қастерлі мамандықтың бірі – ұстаздық. Осы жолға бар саналы ғұмырын арнаған ардақты жанның бірі – Бородулиха ауданындағы Зубаир орта мектебінің білім саласында 40 жылға жуық еңбек етіп келе жатқан ардагер ұстазы Рысалды Жұмағалиқызы Тютенова.
1958 жылы туған Рысалды Жұмағалиқызы 1981 жылы Семей қаласындағы Н.К.Крупская атындағы педагогикалық институтының жаратылыстану факультетін үздік дипломмен тәмамдаған. Еңбек жолын Шаған ауылындағы мектепте химия-биология пәндерінің мұғалімі болып бастаған ол, 1987 жылдан 2022 жылға дейін Зубаир орта мектебінде химия пәнінің мұғалімі және директордың оқу-тәрбие жұмысы бойынша орынбасары қызметін атқарды. 2022 жылдан бастап мектеп кітапханашысы ретінде білім саласында қызметін жалғастырып келеді.
Рысалды Жұмағалиқызы сабақтарында күнделікті өмірден алынған нақты мысалдарды пайдаланып, оқушылардың пәнге қызығушылығын арттыруда белсенді жұмыстар атқарды. Ол жетекшілік еткен ғылыми-зерттеу жұмыстарында шәкірттері аудан, облыс, республика деңгейінде жүлделі орындарға ие болып, химияға қатысты мамандықтарды таңдаған көптеген жас таланттар дүниеге келді. Шәкірттері бүгінде түрлі салада білікті маман болып қалыптасып, ел дамуына үлес қосуда. Олардың арасында Семей медицина академиясының профессоры Ә.Ғ.Мұсайынов, т.б. медицина, ауыл шаруашылығы, білім, ғылым саласында еңбек етіп жүрген абыройлы азаматтар бар.
«Үйрет те, ізгілікке үйрен» деген грек ойшылы Фалестің ұлағатты сөзі Рысалды Жұмағалиевнаның өмірлік ұстанымы болды. Ол өз тәжірибесін республикалық педагогикалық журналдарда бөлісіп, «Ойын технологиясын химия сабақтарында пайдалану» атты әдістемелік құралды құрастырды.
Ұстаздық қызметімен қатар, Рысалды Жұмағалиқызы мектептің қоғамдық өміріне белсенді араласты. Тарихи өлкетану мұражайын ашып, «Рухани жаңғыру» бағдарламасының «Тарих мұрасы» жобасы аясында өткен аудандық «Үздік мектеп мұражайы» байқауында жүлделі орын алды. «Қозы Көрпеш – Баян сұлу» дәстүрлі мерекесін 1999 жылдан бері ұйымдастырып келеді. Сондай-ақ, «Қазақстанның тұрақты даму факторы ретінде мектептің білім мазмұнына ұлттық құндылықтарды кіріктіру» атты аудандық семинар өткізді.
Педагогикалық ұжымда әр ұстаздың шығармашылық ізденісіне жол сілтеп, әріптестерін кәсіби тұрғыдан қолдап отырады. Орыс тілі мен әдебиеті мұғалімдерімен, дене тәрбиесі пәнінің мамандарымен, көршілес мектептер мен аудандық ұйымдармен байланыс орнатып, білім беру процесін байытты.
Кітапханашы ретінде ол «Оқуға құштар мектеп», «Балалар кітапханасы» жобалары бойынша жүйелі жұмыстар жүргізіп, халықаралық вебинарларға қатысып, сертификаттарға ие болды. «ҚР білім беру ұйымдарының үздік кітапханасы және кітапханашысы» республикалық байқауында үздік нәтиже көрсетті.
Ұстаздық еңбегі мемлекет тарапынан да бағаланып, 1997 жылы «Қазақстан Республикасы білім беру ісінің үздігі» төсбелгісімен, 2005 жылы «Қазақстан Республикасы Конституциясына – 10 жыл» мерекелік медалімен, 2023 жылы «Еңбек ардагері» медалімен марапатталды.
Рысалды Жұмағалиқызы тек мектепте ғана емес, аудандық ардагерлер кеңесінің төрайымы ретінде де белсенді еңбек етіп келеді. Ол ауданның ардагер мұғалімдерін облыстық шараларға ұйымдастырып, жақсы нәтижелерге қол жеткізді. Ұзақ жылдар бойы учаскелік сайлау комиссиясының, аналар кеңесінің мүшесі ретінде де өз үлесін қосып келеді.
Қоғамда абыройлы, шәкірттерге өнеге, әріптестерге үлгі болып отырған Рысалды Тютенова – нағыз ұстаздық пен адал еңбектің символы.
Зубаир орта
мектебінің ұжымы