Жақында «AMANAT» партиясының Абай облыстық филалынан арнайы жұмыс тобы арнайы іс-сапармен Бородулиха ауданына келді. Жұмыс тобының құрамында филиалдың атқарушы хатшысы Сейілбек Ысқақов, Абай облыстық мәслихат депутаты Риза Молдашева, филиалдың партиялық бақылау бойынша инспекторы Майра Құржықаева және «AMANAT» партиясы Абай облыстық филалының баспасөз қызметінің жетекшісі Эльмира Жүрсінбекқызы болды.
Жұмыс сапары аясында «AMANAT» партиясының «Халықпен бірге» атты 2023-2027 жылдарға арналған сайлауалды бағдарламасы негізінде әзірленген Жол картасының Бородулиха ауданында іске асырылу барысы туралы жауапты бөлім басшыларының ақпараттары ұсынылды. AMANAT» партиясының сайлауалды бағдарламаларын іске асыру бойынша жол картасын орындау жөнінде аудан әкімі Айдар Ибраев есеп берді. Ол жол картасы жасалғалы бері жоспарланған 40 іс-шараның бүгінгі таңда 17-і орындалғанын, 20 (50 пайыз) жоба іске асырылып жатқанын, орындалмай қалуы мүмкін деген 3 жоба (8%) бар екенін айтты.
Сайлауалды бағдарламаны іске асыру шеңберінде мынадай іс-шаралар орындалды:
1. Ылғал ресурстарын үнемдейтін жаңа технологияларды енгізу, өндірісті заманауи жабдықтармен және жоғары өнімді техникамен жабдықтау іс-шарасы бойынша «Зенковское» ЖШС басшысы М. Құрамысов LFC 2400 сұйық тыңайтқыш енгізу жүйесін және 8350 бункері (сыйымдылығы 13,3 текше метр) бар Bourgault 3330 егіс кешенін жалпы сомасы 176,7 млн. теңгеге сатып алды. Іс-шара орындалды.
2. Ірі қара мал бордақылау алаңдарын ашу арқылы мал басын көбейту және асыл тұқымды малға арналған базаны жақсарту (Бақы ауылдық округі «Табысты Несие» ШҚ). Қазіргі уақытта мал басы саны артқан жоқ. Дегенмен, алдағы уақытта «Жұмағұлов» шаруа қожалығының 50 бас сатып алу жоспарлануда.
3. «Еңбек» мемлекеттік бағдарламасының «Бастау-бизнес» жобасының шеңберінде мал шаруашылығын, оның ішінде ірі қара, шошқа, қоян, сондай-ақ ара шаруашылығын одан әрі дамыту үшін жыл сайын кемінде 25 грант беру. Аталған бағыт бойынша осы жылдың 6 айында аталған шаруашылықтарды дамытуға 10 грант берілді.
4. Аудан негізінен егін шаруашылығымен айналысатын болғандықтан, дәнді дақылдардың өнімділігін 10,2 ц/га — дан 12,5 ц/га-ға дейін, атап айтатын болсақ: бидай, күздік қара бидай, арпа, сұлы дәнді дақылдарын және майлы дақылдар өнімділігін 7 ц/га-дан 10 ц/га-ға дейін ұлғайту жоспары қойылды. Ауыл тұрғындарының жалақысын 25%-ға арттыру. Статистикалық мәліметтерге сәйкес, аудан бойынша орташа табыс 260,9 мың теңгені құрайды.
Сондай-ақ «AMANAT» партиясының Бородулиха аудандық депутаттық фракциясы мен партиялық бақылау комиссияларының мүшелерімен кездесу өткізіліп, атқарылған жұмыстар туралы есептері тыңдалды.
Кездесу барысында партияның жұмысын жандандыруға және ауданның әлеуметтік-экономикалық дамуына үлес қосып жүрген азаматтарға партия филиалының атқарушы хатшысының алғыс хаттары табысталды.
Аудан орталығында салынып жатқан дене шынықтыру-сауықтыру кешенінің, Белағаш, Петропавловка ауылдарындағы мәдениет үйлерінің құрылысы мен су құбырын тарту жұмыстарының барысымен танысты. Сондай-ақ, Успенка орманшылығында болып, қызметкерлерімен сұхбаттасып, сұрақтары мен өтініштерін тыңдады. Биыл жазда өрт салдарынан қаза тапқан марқұмдардың туыстарымен, әріптестерімен кездесті.
Іс-сапар барысында партияның жұмыс тобы Жол картасы бойынша ашылған және құрылысы жүріп жатқан бірнеше нысанды аралады. Олар жұмыс барысымен танысып шыққаннан кейін тиісті нұсқауларды берді.
Биыл Бородулиха ауданы үшін ауыртпалығы көп жыл болғанымен, атқарылып жатқан жұмыстардың аз еместігін байқадық. Айдар Маратұлы Ибраев аудан басшылығына дәл осындай сын сағатта тағайындалған болатын. Жарма ауданы әкімінің орынбасары, облыстық мәдениет басқармасының басшысы қызметтерін атқарып, мемлекеттік қызметте шыңдалған азаматтың Бородулиханың өркендеуіне үлес қосатынына сеніміміз мол.
Сұлтан Ибрагимов
