Мемлекеттік рәміздер – бұл кез келген мемлекеттің егемендігі мен тұтастығын бейнелейтін нышандарының бірі. Төрткүл дүниенің төрінде желбіреген көк Туымыз, киелі шаңырақтан күн нұры шашылып, қанатты пырақтарымыз бейнеленген Елтаңбамыз, оң қолымызды жүрек тұсына шегелеген Әнұранымыз – мемлекеттігіміздің нышаны, бірліктің алтын тұғыры. Туған жерге деген мақтаныш пен сүйіспеншілік мемлекеттік рәміздерді құрметтеуден басталады.
Аудан әкімі Айдар Ибраевтың төрағалығымен өткен аудан әкімдігінің отырысында Бородулиха ауданында мемлекеттік рәміздерді қолдану және насихаттау мәселесі қаралды. Отырысқа аудандық мәслихаттың төрағасы, аудан әкімінің орынбасары, ауылдық округ әкімдері, мекемелер мен ұйымдардың басшылары қатысты.
Бородулиха аудандық ішкі саясат бөлімінің басшысы Анар Оразалинаның айтуынша, әкімдік жанынан құрылған Қазақстан Республикасының мемлекеттік рәміздері жөніндегі тұрақты комиссия рәміздердің заң талаптарына сай дұрыс қолданылуын қадағалайды. Қомиссия тұрақты түрде мониторинг жүргізеді.
-Комиссия мүшелерімен тексеру жүргізу кезінде Бородулиха ауданының аумағындағы мекемелерде 135 Ту мен 124 Елтаңба бар екені анықталды. Барлық мемлекеттік рәміздер уақытында жаңартылып, пайдалануға жарамсыз болып қалған рәміздер ауыстыру және жою ережелеріне сәйкес жойылады. Аудандағы, ауылдардағы мекемелердегі мемлекеттік рәміздерді ауыстыру және жою бойынша ішкі саясат бөлімі мониторинг жүргізіп, 4 кемшілікті анықтады,- деді Анар Қайратқызы.
Мемлекеттік рәміздерге құрмет еліміздің әр азаматының жүрек түкпірінде, сана биігінде тұрғаны абзал. Ұлтына, жасына қарамай әрбір қазақстандық Елтаңба мен Туымызды қастерлеп, Әнұранымызды қолын жүрегіне қойып, қосыла айтуы парыз. Жас ұрпақты отаншылдыққа тәрбиелеп, санасына сіңіріп, ойына ұялату мақсатында аудан мектептерінде күн сайын Әнұран шырқалып, жыл бойы мемлекеттік рәміздерді білуге арналған конкурстар, олимпиадалар, әр түрлі шаралар ұйымдастырылады. Бұл өскелең ұрпағымыздың елжанды, өр рухты болып, Қазақстанның абыройын асқақтатсын деген сенімнен туған іс.
Айта кетсек, күн тәртібінде аталған тақырыптан бөлек, Бородулиха ауданында тіл саясатын дамыту тұжырымдамасын іске асыру бойынша 2024-2029 жылдарға арналған іс-шаралар жоспарын жүзеге асыру барысы, ауыл шаруашылығы жерлерін ұтымды пайдалану мәселелері талқыланды.
Отырыста қатысушылар арасында белсенді пікірталас өрбіп, көтерілген мәселелер бойынша одан әрі жұмыс істеу үшін шешімдер қабылданып, жауапты тұлғаларға тапсырмалар берілді.
Ай-Керім СӘРСЕНҚАЛИ,
«Жаңа уақыт» 