Бородулиха ауданында көктемгі егін науқанына қызу дайындық жүріп жатыр. Аудан шаруалары техника жөндеу, тұқым дайындау жұмыстарына өткен айда кіріскен.
Бородулиха аудандық кәсіпкерлік және ауыл шаруашылығы бөлімінің басшысы Маратбек Нұркешевтің айтуынша, жоспарға сәйкес, көктемгі дала жұмыстарын жүргізу үшін 22,65 мың тонна дәнді дақылдар, 960 тонна майлы дақылдар қажет. Бүгінгі күні ауданның ауылшаруашылық тауарын өндірушілері дақылдардың қажетті мөлшерін әзірлеген.
Сапалы тұқым – мол өнім кепілі. Көктемгі дала жұмыстарын бастамас бұрын әр диқан тұқымның сапасын тексеріп, қорытынды алуға міндетті. Аудан аграрийлері қазіргі уақытта тұқым материалын тексеру жұмыстарын жүргізуде.
Ауданның бас аграрийінің мәліметіне сүйенсек, бүгінгі күні 4,390 мың тонна тұқымның немесе қажетті көлемнің 25,8 пайызының сапасы тексеріліп, сәйкестігі анықталған. Сортты жаңарту және тұқым материалын шаруашылықтармен алмастыру мақсатында жоғары репродукциялы тұқымдар сатып алынуда. Осы мақсатта 7,4 мың тонна көлемінде тұқым сатып алу жоспарланған. Ауданда күнбағыс, бидай, арпа және қарақұмық тұқымдарын саудалайтын 1 элиталық тұқым және 4 тұқым шаруашылығы бар,- деп атап өтті.
Мол өнім алу үшін, тұқымның сапасымен қатар, күтім жасап, дер кезінде керекті тыңайтқыштармен қоректендірудің де маңызы зор. Қазіргі уақытта ауыл шаруашылығы тауарын өндірушілер 1647,4 тонна минералды тыңайтқыш сатып алыпты. Қосымша 400 тонна алу жоспарланып отыр.
Әрбір ауылдық округтегі шаруа қожалықтары егін науқанын жүргізуге қажетті техникаларын сайлап, дала жұмыстарына дайындықтарын жүргізіп жатыр.
Маратбек Нұркешевтің сөзінше, ауданда көктемгі егіс жұмыстарын жүргізуге қажетті тракторлар, топырақ өңдеу және егіс техникалары жеткілікті, оларды жөндеу және дайындау жұмыстары жалғасуда. Дала жұмыстарын жүргізу үшін 1722 бірлік шынжыр табанды және доңғалақты техника жұмылдырылатын болады. Сонымен қоса ылғалды жабу үшін ені әр түрлі тіркеме, түрлі соқалар, қопсытқыштар мен сыдыра қопсытқыштар, барлық маркалы егіс кешендері, дәнсепкіштер – барлығы 2193 агрегат әзір тұр. Ауылдық округ әкімдіктерінен алынған жедел деректер бойынша, бүгінгі күні дайындық 95-98 пайызды құрайды, бұл орташа облыстық көрсеткішке сәйкес келеді.
Көктемгі егіс жұмыстарын жүргізу үшін аудан шаруаларына 6,3 мың тонна дизель отыны қажет. Қазіргі уақытта ауыл шаруашылығы тауарын өндірушілер дизель отынын алуға өтінімді «Gosagro» порталы арқылы дербес ресімдейді. Өтінімдер негізінен өткен жылғы 1-20 желтоқсан аралығында қабылданған.
Айта кетсек, өткен аптада ҚР Премьер-Министрі Олжас Бектеновтің төрағалығымен өткен Үкімет отырысында көктемгі дала жұмыстарына дайындық барысы талқыланған болатын. Үкімет отырысында айтылғандай, биыл елімізде 23,8 млн гектар алқапқа егін егіледі. Ауыл шаруашылығы тауарын өндірушілер үшін 340,3 мың тонна жанар-жағармай жеткізу кестесі бекітілген. Баға барлық 20 өңірде 2023 жылғы деңгейде қалды – ҚҚС-пен литрі 250 теңгеден. Бұл бөлшек сауда құнынан 15 пайызға төмен.
Премьер-Министр Олжас Бектенов егіс науқанын сапалы әрі уақтылы жүргізу мақсатында Үкімет қажетті шаралар қабылдағанын атап өтті. Атап айтқанда, көктемгі егіс жұмыстарын жүргізуге «Кең дала» бағдарламасы бойынша жеңілдікпен 140 млрд теңге несие беріледі. Сондай-ақ жергілікті бюджеттерден қосымша 100 млрд теңге бөлінеді. Сонымен қатар форвардтық сатып алуға 40 млрд теңге және субсидиялар түрінде 95,4 млрд теңге қарастырылған. Бұл – ырысын Жер-анадан табуға ниетті шаруаларға көрсетіліп жатқан үлкен қолдау.
Әйгерім СӘРСЕНҚАЛИ,
«Жаңа уақыт»