Бородулиха ауданы әкімдігінде отбасылық-тұрмыстық зорлық-зомбылықтың алдын алу жөніндегі ведомствоаралық комиссияның отырысы өтті.
Жиынға әйелдерді зорлық-зомбылықтан қорғау істері жөніндегі инспектор Альмира Дүзбенбетова, Отбасыны қолдау орталығының директоры Дарья Пичитаева, аудандық аурухананың психологы Мөлдір Арғымбаева, сондай-ақ салаға қатысты бөлімдердің өкілдері қатысты.
Комиссия жұмысының басты мақсаты – тұрмыстық зорлық-зомбылықтың алдын алу, отбасыларды қолдау шараларын жетілдіру және мемлекеттік органдар арасындағы өзара іс-қимылды күшейту.
Альмира Дүзбенбетова ҚР Ішкі істер министрлігінің бастамасымен жүргізіліп жатқан анонимді сауалнама-зерттеу туралы мәлімет берді. Оның айтуынша, сауалнама тұрғындардың ой-пікірін жинақтап, алдын алу шараларын нақтылауға мүмкіндік береді.
— «Бұл зерттеуде жеке деректер талап етілмейді. Сауалнамаға неғұрлым көп адам қатысса, қолдау мен алдын алу шаралары да соншалықты тиімді болады», – деді инспектор.
Кездесу барысында отбасылық зорлық-зомбылық фактілерін анықтау, жәбірленушілерді қолдау және оларды сүйемелдеу кезінде ведомствоаралық өзара іс-қимылдың бірыңғай алгоритмін енгізу мәселелері қаралды.
Комиссия мүшелері алдағы уақытта құқық қорғау органдарының, әлеуметтік қызметтердің және медициналық мекемелердің өзара байланысын нығайтуға, зорлық-зомбылық құрбандарын қорғау шараларын күшейтуге уағдаласты.
Бородулиха ауданы әкімінің
баспасөз қызметі
