Өткен аптада Бородулиха ауданына жұмыс сапарымен Қазақстан Республикасы Президентінің кеңесшісі Мәлік Нұржанұлы Отарбаев келді. Сапар аясында аудандық мәдениет үйінде Мемлекет басшысы Қасым-Жомарт Тоқаевтың «Қазақстан жасанды интеллект дәуірінде: іргелі цифрлық қайта құру арқылы шешудің өзекті міндеттері мен жолдары» атты Жолдауын түсіндіруге арналған кең көлемді басқосу өтті.
Жиынды аша отырып, Бородулиха ауданының әкімі Айдар Ибраев Жолдаудың ел дамуы үшін стратегиялық маңызына тоқталды.
— «Президент Жолдауы мемлекет үшін шешуші рөл атқарады. Онда жасанды интеллектті экономикаға енгізу, ауылдық аумақтарды дамыту, мемлекеттік қызметтердің тиімділігін арттыру және халықтың тұрмыс сапасын жақсартуға бағытталған нақты міндеттер қойылған. Ең бастысы – бұл өзгерістердің әр азаматтың өмірінде нақты көрініс табуы тиіс», — деді аудан басшысы.
Келесі сөз алған аудандық мәслихат төрайымы Сәуле Урашева Жолдаудың реформалық сипатына назар аударды.
— «Қазіргі Жолдау елдің аса өзекті сұраныстарына жауап береді. Онда саяси жаңғырту, әлеуметтік тұрақтылық, адами капиталды дамыту және азаматтардың қаржылық сауаттылығын арттыру мәселелері кеңінен қамтылған», — деді ол.
Қоғамдық кеңес мүшесі Рыскүл Атаева да Жолдаудың тың бағыттары жайында өз пікірін білдіріп, қоғам тарапынан белсенді қолдау қажеттігін атап өтті.
Жиынның негізгі бөлімінде Президенттің кеңесшісі Мәлік Отарбаев сөз алып, Жолдауда белгіленген жаңа басымдықтар мен ұлттық деңгейдегі міндеттерді жан-жақты түсіндірді.
— «Бұл Жолдау – саяси ғана емес, идеологиялық салмағы бар, мемлекет дамуының жаңа кезеңін айқындайтын маңызды құжат. Президент жасанды интеллектті экономиканың барлық саласына енгізудің нақты тетіктерін көрсетті. Цифрлық трансформация – жаһандық бәсекеге қабілетті болудың басты шарты», — деп атап өтті ол.
Кездесу барысында тұрғындар өздерін қызықтырған сұрақтарын қойып, пікір алмасты. Жиын өңірде цифрландыру мен экономикалық жаңғыру бағытында атқарылатын жұмыстардың жаңа кезеңін айқындаған маңызды диалог алаңына айналды.
Ш.ДОСКЕЕВА,
«Жаңа уақыт»
