Жезкент – тарихы тереңде жатқан кеншілер елді мекені ғана емес, әсіресе бүгінгі күні, жаздың ыстық күндерінде өрт қаупінің жоғарылауы жағдайында тұрғындардың қауіпсіздігі ерекше маңызға ие жер.
Жезкентте өрт сөндіру күштерін күшейтудің өзектілігі айқын: айналасында көпқабатты және жеке үйлер, әлеуметтік нысандар бар. Төтенше жағдайдағы кез келген кешіктіру қайғылы жағдайға әкеліп соғуы мүмкін.
13 маусым Жезкент кентіндегі №20 өрт сөндіру бөлімі жаңа өрт сөндіретін техникамен толықты. Жаңа өрт сөндіру техникасының жеткізілуі өңірдің төтенше жағдайларға дайындығын арттыра түсті. Бұл мамандарға өздеріне жүктелген міндеттерді тиімді əрі сапалы орындауға мүмкіндік береді.
Жаңа техниканың келуін ауыл округінің әкімі Бақыт Садықова, өртке қарсы бөлім қызметкерлері мен аудандық мәслихат депутаты Мейіз Сүйіндікова қазақы дәстүр бойынша салтанатты түрде шашу шашып, көрімдікпен қарсы алды.
Өрт сөндіру техникасының келуі көлік паркін толықтыру ғана емес – бұл адамдардың өмірі мен үйлерін қорғауға жасалған қадам.
Бүгінгі таңда Абай ауданы ТЖД «Өрт сөндіру және Төтенше жағдайлар басқармасы» ММ ПП-20-да үш өрт сөндіру машинасы бар: АЦ-40 (131) 137 «А», екі АС-5-40 43253.
Мұнда штат бойынша 10 адам жұмыс істейді. Олардың әрқайсысы кез келген сәтте өрттің алғы шебінен табылатын, азаматтарды түрлі төтенше жағдайлардан қорғау бойынша өздерінің кәсіби міндеттерін тиімді шеше алатын өз ісінің мамандары.
— Бүгінгі күні өрт сөндірушілерге қажетті қолдау көрсетілгеніне қуаныштымыз. Өрт сөндірушілердің жұмысының жылдамдығы мен тиімділігі осыған байланысты. Жаңа техника – көмектің дер кезінде келетіндігінің кепілі, – деді өз сөзінде ауыл әкімі Бақыт Рысқұлқызы.
Жезкент кенттік округінің әкімдігі 