Кеншілер – өздерінің ауыр еңбегімен жер қойнауынан тек кен мен көмір ғана емес, ертеңгі күнге деген сенімді де алып шығатын жандар. Олар ел дамуына өлшеусіз үлес қосып, қайсарлығы мен ісіне адалдығының арқасында күш-қайраттың, төзімділіктің және нағыз еңбек ерлігінің символына айналды.
23 тамыз күні Жезкент кентінде елді біріктірген айтулы оқиға – Кеншілер күні кең көлемде аталып өтті.
Шара «Кеншілер даңқы» ескерткішінің жанында өткен тағзым рәсімінен басталды. Қатысушылар бір минут үнсіздік жариялап, еңбек жолында қаза тапқан кеншілер рухына гүл шоқтарын қойды. Игі шараға Жезкент кентінің әкімі Б. Садыкова, Орлов өндірістік кешенінің директоры Е. Косых және кент тұрғындары қатысты.
Күндіз бүлдіршіндер үшін қызықты ойын-сауық бағдарламалары ұйымдастырылды. Әртүрлі байқаулар мен спорттық жарыстар балалардың мерекелік көңіл күйін еселей түсті.
Кешкісін кеншілер еңбегін ұлықтауға арналған мерекелік концерт өтті. Оған кент тұрғындары мен қонақтар жиналды. Салтанатты кешті аудан әкімінің орынбасары Қайрат Сапоров ашып, кенші мамандығының Жезкент кенті мен жалпы ауданның әлеуметтік-экономикалық дамуы үшін ерекше маңызға ие екенін атап өтті.
Өз тілшіміз