26 қыркүйек күні Абай облысының орталығында Еңбек күніне арналған салтанатты жиын өтіп, республикалық «Еңбек жолы – 2025» байқауының облыстық кезеңінің жеңімпаздары марапатталды. Бұл мерейлі шара аймақ еңбеккерлерінің абыройын асқақтатып, жас буынға үлгі болатын айтулы оқиғаға айналды.
Жиында ауданымыздың мақтанышына айналған жерлестеріміз жеңімпаз атанды.
«Жұмысшы жастардың үздік тәлімгері» номинациясында Нұрлан Түркістанұлы Байбутинов жеңіске жетті. Нұрлан Байбутинов «Востокцветмет» ЖШС Орловка өндірістік кешенінде 21 жылдан бері табанды еңбек етіп келе жатқан жоғары білікті маман. Өз ісінің нағыз шебері ретінде ол жас қызметкерлерге сенімді тәлімгер болып, еңбек дәстүрлерін сақтап, өндірістік тәжірибені жас буынға жеткізуде айрықша еңбегімен ерекшеленді.
Ал «Өндірістің үздік жас маманы» номинациясында Айбар Айдарұлы жеңімпаз атанды. Ол Орловка өндірістік кешенінде 5 жыл еңбек етіп, осы қысқа мерзімде жауапкершілігімен, бастамашылдығымен және кәсіби біліктілігімен көзге түсіп, өндіріс саласында сенімді түрде мансап жолын қалыптастыруда.
Жеңімпаздарға ақшалай сертификаттар мен естелік мүсіншелер табысталды.
Бұл жетістіктер – бүкіл ауданның абыройы, еңбектің қадір-қасиетін танытқан жарқын үлгі. Жас буын үшін жерлестеріміздің табысы еңбекке адалдық пен табандылықтың шынайы өнегесі болып қала бермек.
Жеңімпаздарымызды шын жүректен құттықтаймыз!
Шайза АСАНҚЫЗЫ,
«Жаңа уақыт»
