Бородулиха ауданының құтқарушылары облыстық өрт-құтқару спортынан күміс жүлдегер атанды!
2025 жылғы 10 қазанда Абай облысында ерікті өртке қарсы құрамалар, өрт сөндіру бекеттері және жергілікті атқарушы органдар командалары арасында «Ауыл құтқарушылары» атты облыстық турнир өтті.
Жарысқа өңірдің 9 үздік командасы қатысып, нағыз ерлік мектебі өрбіді. Қатысушылар биіктерді бағындырып, өрт сөндіру шлангілерін төсеп, шартты өртті ауыздықтап, сәт сайынғы шапшаңдық пен темірдей төзімділігін көрсетті.
Осы қызу додада Бородулиха ауданы Новопокровка ауылдық өрт сөндіру бекетінің командасы абыроймен өнер көрсетіп, құрметті ІІ орынға ие болды. Жеңімпаздарға Құрмет грамоталары мен сыйлықтар табысталды, әріптестерінің ыстық ықыласына бөленді.
– Бізге берілетін әр шақырту – адам өміріне тікелей жауапкершілік. Ал мұндай жарыстар шынайы шақырулар сияқты бізді шыңдайды, – дейді тәжірибелі өрт сөндіруші, жарыстардағы ең тәжірибелі қатысушы Талғат Бодаев. Команда сапында буын сабақтастығы да айқын көрінді: ардагер өрт сөндірушілермен бірге жас мамандар да сынға түсті. «Ең жас қатысушы» номинациясында Камиль Шаризанов озып шығып, болашақта кәсіби құтқарушы болуға үлкен үміт сыйлады.
Өрт-құтқару спорты тек күш пен ептілікті ғана емес, өзара сенім мен ауызбіршілікті талап етеді. Дәл осы қасиеттер Бородулиха құтқарушыларын өзгелерден ерекшелейді.
Олардың күміс жүлдесі – жай ғана марапат емес, кәсібиліктің, бірліктің және өз ісіне деген адалдықтың айқын дәлелі. Алдағы уақытта да тек спорттық жеңістер көп болғай, ал нағыз өмір сынақтары аз болсын!
Құтқарушылар – адамдар үрейленген сәтте ең бірінші көмекке келетін жандар. Сондықтан да бородулихалық батырлар тағы бір мәрте дәлелдеді, олардың күші бірлікте және мақсаты – адам өмірін сақтау.
Бұл жетістік – қажырлы еңбектің, ұйымшылдықтың және кәсіби дайындықтың нәтижесі. Қауіпсіздік қызметіндегі мұндай табыс аудан тұрғындары үшін зор мақтаныш болып табылады.
Бородулиха ауданының батыл өрт сөндірушілерін шын жүректен құттықтаймыз! Еңбектеріңіз әрдайым жемісті болып, ел қауіпсіздігі жолындағы қызметтеріңіз абыройлы бола берсін.
А.НЕСІПБАЕВА
