Мемлекет басшысы Қасым-Жомарт Тоқаевтың тапсырмасына орай қолға алынған
«Таза Қазақстан» экологиялық акциясы Бородулиха ауданында қарқынды түрде жүзеге асырылуда. Экологиялық мәдениетті қалыптастыру мен қоршаған ортаны қорғауға бағытталған акцияның үшінші «Жасыл аймақ» апталығы облыс әкімі Нұрлан Ұранхаевтың қатысуымен «Семей орманы» мемлекеттік орман табиғи резерватының аумағында басталды.
«Бородулиха ауданының реликті орманын сақтайық» атты кең ауқымды облыстық шараға облыстық және аудандық мәслихат депутаттары, ардагерлер кеңесінің мүшелері, белсенді жастар, студенттік ұйымдар, Семей қаласы мен Бородулиха ауданы мекемелерінің қызметкерлері – жалпы мыңға жуық адам қатысты.
— Бүгін тұтас ел көлемінде кең қолдауға ие болған «Таза Қазақстан» — экологиялық акциясы шеңберінде, облысымызда ерекше маңызы бар шара өтуде. Мемлекет басшысының тікелей бастамасымен жүзеге асқан бұл акцияның арқасында Отанымыздың әр облысы, қаласы мен ауылы абаттанып, көшеттер отырғызылып, өңіріміз жаңа кейіпке еніп келеді. Бұл «Атадан мал қалғанша, тал қалсын» деген игі дәстүрдің жалғасы, — деді облыс әкімі Нұрлан Ұранхаев.
Бұл науқанның негізгі мақсаты – көшет отырғызу арқылы экологиямызды жақсартып, қарағайлы орманымызды жедел қалпына келтіру.
— Өткен жылы біз және бізген бірге бүкіл еліміз екі рет реликті орман өртін өткердік. Өкінішке орай, жасыл желек қана отқа оранып қоймай, адам шығыны да орын алды. Орманды оттан қорғаймын деп, алапат өрттен шыға алмай, қаза тапқан жерлестеріміздің ерлігін жадымызда сақтаймыз. Орман алқаптарын ұлғайтумен қоса, жасыл желекті қорғау да үлкен мәнге ие. Табиғатты қорғауға үлес қосуға келген барлық ізгі ниетті жандарға алғыс айтамын. Бүгінгі көшеттер атадан қалған тал болып, кейінгі ұрпаққа сая болғай, — деді аудан әкімі Айдар Ибраев.
Акция барысында Воскресеновка ауылының маңындағы орман алқабындағы 10 гектар аумаққа 20 мыңнан астам қарағай көшеті отырғызылды.
Экологиялық акция барысында аудан тұрғындарының да ерекше белсенділігі байқалды.
— Ауданымызда «Жасыл аймақ» апталығы аясында қарағай көшеттерін отырғызу бойынша облыстық шара өтті. Облыс әкімі Нұрлан Тельманұлы бастаған 1000-нан астам белсенді орманды алқапқа көшет отырғызды. Былтырғы өрттен кейін бұл орынды шара болды. «Бір тал кессең, он тал ек»деген. Әлемде сирек кездесетін қарағайлы орманын сақтау, көбейту болашақ ұрпақ алдындағы қасиетті парызымыз деп есептеймін, — деді Ардагерлер кеңесінің төрағасы Д.Ахмадиев.
Әлемдегі экологиялық проблемаларды еске алсақ, қарағайлы орманның адамзат баласына тигізер пайдасы орасан. Сап түзеген қарағайымен, саф алтындай таза ауасымен ерекшеленетін бұл өлке еліміздің табиғи байлығы саналады. Оны күтіп-баптау – абыройлы міндет.
— Жақсылықтың жаршысына айналған көктем мезгілі – барлық игі іс пен қызу еңбектің бастауы. Егер осы кезеңде айналамызды жасыл желекпен толтырып қойсақ, жайқалған табиғат өз кезегінде ауданның көркіне көрік қосып қана қоймай, оттегінің де мол қорын қалыптастырып, экологияны жақсартуға септігін тигізер еді. Осындай игі іс шараға қатысқаныма қуаныштымын, — деді Зубаир орта мектебінің мұғалімі Г.Елюбаева.
Айта кетсек, Бородулиха ауданының аумағы 698 992 гектар болса, оның ішінде орманды алқап – 87 773 гектарды, су айдындары – 14 301 гектарды құрайды. Биыл аудан көлемінде 7 мыңнан астам ағаш көшеттерін отырғызу жоспарлануда. Ағаш отырғызу акциялары тұрақты түрде өтеді.
Ай-Керім СӘРСЕНҚАЛИ,
«Жаңа уақыт»
