Бородулиха ауданындағы «Dos Bol Like» балалар лагерінде 80-нен астам жасөспірімді қамтыған танымдық кездесу өтті. Шараны Абай облысының Дін мәселелерін зерттеу орталығы мен ауданның ішкі саясат бөлімі бірлесіп ұйымдастырды.
Кездесудің негізгі мақсаты – жастар арасында діни экстремизм мен терроризмнің алдын алу, сондай-ақ әлеуметтік желілерді қолдану барысында кездесетін қауіп-қатерлерден сақтандыру болды.
Мамандар жастарға түсіндіру жұмыстарын жүргізіп, қазіргі таңда интернет пен әлеуметтік желілерде таралып жатқан жалған ақпараттар мен теріс ағымдардың ықпалына қарсы тұрудың жолдарын түсіндірді. Әсіресе, киберқауіпсіздік, жеке деректерді қорғау, күмәнді топтар мен сайттардан аулақ болу мәселелері ерекше назарға алынды.
— «Жастардың санасына дұрыс бағыт-бағдар беру – біздің ортақ міндетіміз. Бүгінгі әңгіме оларды күмәнді ағымдардан сақтандыруға, болашаққа сеніммен қадам басуына көмектеседі», – деді орталық мамандары.
Іс-шара барысында оқушылар сұрақтар қойып, пікір алмасып, өз ойларын ортаға салды. Жастарға діни толеранттылықтың маңызы, дәстүрлі құндылықтарды дәріптеу және ақпаратты дұрыс көздерден алу қажеттігі кеңінен түсіндірілді.
Өз тілшіміз