Абай облысының спорт саласын дамыту және жасөспірімдер арасындағы бұқаралық спортты кеңінен насихаттау мақсатында жыл сайын өз жалғасын тауып келе жатқан маңызды жарыстардың бірі – қазақ күресінен жас балуандар бәсекесі. Биыл да бұл дәстүр жаңғырып, қарашаның 14-16 күндері 2010–2011 жылғы кіші жасөспірімдер арасында ҚР спорт шебері Шалқар Ахметқалиұлы Сарсеқановты еске алуға арналған Абай облысының ашық турнирі жоғары деңгейде өтті.
Жарыс Бородулиха ауданының денешынықтыру-сауықтыру спорт кешенінде ұйымдастырылып, облыстың әр өңірінен және көршілес аудандардан келген 100-ге жуық жас балуан бозкілемге шықты.
Турнирдің негізгі мақсаты – қазақ күресін дамыту, жасөспірімдердің спортқа деген қызығушылығын арттыру, сондай-ақ белгілі спортшы, өз дәуірінде талай жасқа үлгі болған Шалқар Сарсеқановтың есімін ұлықтау, оның еңбегін жас буын санасына сіңіру.
Жарыс өте тартысты өтті. Әрбір жас спортшының жеңіске деген жігері, спортқа деген құрметі айқын көрінді. Жаттықтырушылардың жүйелі еңбегі, оқушылардың табандылығы мен дайындығы өз жемісін берді.
Жарыста аудан намысын қорғаған Абай облысы дене шынықтыру және спорт басқармасының «Бородулиха ауданының балалар-жасөспірімдер спорт мектебі» КММ-нің жас балуандары турнирде жоғары нәтижелерге қол жеткізді: 50 келі салмақта Әбетов Дәулет, 38 келіде Сиырбай Айбар, 60 келіде Оразаев Мейіржан, 46 келіде Құмаров Арнұр шеберліктерімен көзге түсіп, І орынды жеңіп алды.
ІІ орын иегерлері: 46 келіде Құмаров Ернұр, 60 келіде Мейрамұлы Әкежан.
ІІІ орын иеленген спортшылар: 55 келіде Жұмабек Ғибрат, 65 келіде Қайса Айбек, 38 келіде Бақытбекұлы Нұрәли мен Есхат Санжар, 46 келіде Сембай Нұрәділ.
Жас спортшылардың бұл жетістіктерінде бапкерлердің еңбегі айрықша. Оларды жарысқа дайындап, техникалық әрі психологиялық тұрғыда қолдау көрсеткен жаттықтырушылар – Қажымұқанов Мұсылманбек, Әленов Саят, Көкенов Жасұлан, Сүлейменов Ерслан және Байболов Қуаныш. Бұл мамандардың тәжірибесі мен жанкештілігі жас балуандардың биік белестерді бағындыруына негіз болып отыр.
Жасөспірімдердің бүгінгі жеңісі олардың өз күшіне деген сенімін арттырып қана қоймай, ауыл мектептеріндегі спортты дамыту бағытында жүргізіліп жатқан жұмыстардың нәтижелі екендігін көрсетеді. Сонымен бірге, бұл табыстар өзге оқушыларға үлгі болып, бұқаралық спортқа деген қызығушылықты арттыра түсері сөзсіз. Жас балуандар алдағы уақытта да аудан намысын асқақтатып, республикалық және облыстық деңгейдегі жарыстарда жүлделі орындардан көрінуді мақсат етіп отыр.
Қазақ күресі – ұлттық рухты көтеретін, батылдық пен табандылыққа тәрбиелейтін төл спорт. Мұндай турнирлер – болашақ чемпиондардың қалыптасуына жол ашатын маңызды алаң.
Жеңімпаздарды шын жүректен құттықтай отырып, жас спортшыларға спорт жолында толағай табыстар мен биік жеңістер тілейміз!
Ш.ДОСКЕЕВА,
«Жаңа уақыт»
