Қазақстанда Төтенше жағдайлар комитетінің құрылған күні жыл сайын Құтқарушы күні ретінде атап өтіледі. Бұл күн – халықтың қауіпсіздігін күзетіп, төтенше жағдай кезінде алдыңғы шепте жүретін мамандардың еңбегін айрықша бағалауға арналған.
Солардың бірі – Бородулиха ауданы Новая-Шульба ауылы №19-ӨСБ бөлімшесінің командирі Темірлан Ерланұлы Көпбаев.
Темірлан Ерланұлы 2002 жылы 15 маусымда Алматы облысы Қаратал ауданы Үштөбе ауылында дүниеге келген. 2007 жылы «Мұрат бастауыш мектебінде» білім жолын бастап, кейін Семей қаласындағы №39 орта мектепті 2017 жылы тәмамдады.
Білімін жалғастырып, 2017–2020 жылдар аралығында Семей қаласындағы Шығыс Қазақстан техникалық колледжінде «Электр газбен дәнекерлеуші» мамандығын меңгерді. Оқуды аяқтаған соң еңбек жолын «Азия» фирмасында жалғастырды.
2021 жылы Отан алдындағы борышын өтеп, 2201 әскери бөлімінде барлаушы-атқыш қызметін атқарды. Әскери қызметтен кейін азаматтық қорғау саласына бет бұрып, 2022 жылдың қазан айынан бері Новая-Шульба ауылында №19-ӨСБ бөлімше командирі болып еңбек етіп келеді.
Қызмет барысында Темірлан Ерланұлы жауапкершілігімен, кәсібилігімен және батылдығымен ерекшеленіп келеді. Оның өмірлік ұстанымы – елге адал қызмет ету, халықтың қауіпсіздігіне өз үлесін қосу.
Құтқарушылар күні – осындай жас та жігерлі мамандардың еңбегін дәріптейтін мереке. Қоғам тыныштығы үшін аянбай еңбек етіп жүрген Темірлан Ерланұлына алдағы уақытта да зор табыс пен жаңа белестер тілейміз!
Шайза АСАНҚЫЗЫ,
«Жаңа уақыт»