Белағаш ауданының Зенковка ауылында тұрғындардың қауіпсіздігі үшін маңызды нысан – жаңа өрт сөндіру бекеті ашылды.
Салтанатты рәсімге Бородулиха ауданының әкімі Айдар Ибраев, Абай облыстық ТЖД бастығы Манарбек Шапағатов, Бородулиха аудандық ТЖ бөлімінің бастығы Ержан Сүлейменов, жергілікті әкімдік өкілдері мен ауыл тұрғындары қатысты.
Ашылу барысында аудан әкімі Айдар Ибраев бұл оқиғаның аймақ үшін ерекше маңыздылығын атап өтіп:
— «Бүгін біз шынымен де маңызды сәтке куә болып отырмыз. Зенковка ауылында өрт сөндіру бекетінің ашылуы – тек ауданымыз үшін емес, облыс пен ел көлемінде де маңызды оқиға. Ол адамдардың қауіпсіздігі мен табиғи байлығымызды қорғауға тікелей ықпал етеді. Ирина Николаевна мен Константин Адамович Поптар отбасының азаматтық бастамасы мен қолдауына зор алғыс білдіремін. Олардың үлесі арқасында жылытылатын бокс салынып, өрт сөндіру қызметіне барлық жағдай жасалды», – деді.
Өз кезегінде Абай облыстық ТЖД бастығы Манарбек Шапағатов:
«Биыл облыста 834 өрт тіркелді, оның жартысына жуығы тұрғын үй секторында. 200-ден астамы табиғи өрт. Жаңа бекет өрт сөндірушілердің келу уақытын қысқартып, жалпы саны 2304 адам тұратын ауданның 7 елді мекенін қорғауға мүмкіндік береді. Бұл – төтенше жағдайлардың алдын алуда және жедел әрекет ету тиімділігін арттыруда үлкен қадам», – деп атап өтті.
Зенковка ауылына сіңірген еңбегі үшін тұрғындар тарапынан ерекше құрметке ие болған Константин Поп көпшіліктің алғысына бөленді. Ол ауылда облыста теңдесі жоқ жабық хоккей кортын салып, жаңа пошта ғимаратының құрылысына да айтарлықтай үлес қосты. Енді елді мекеннің қауіпсіздігін арттыру ісіне бастамашы болып, өрт сөндіру бекетінің ашылуына қолдау көрсетті.
Салтанатты рәсім соңында лента қиылып, ауыл тұрғындары жаңа боксты, өрт сөндіру техникасы мен заманауи жабдықтарды көрді.
Айта кетейік, биыл осындай өрт сөндіру бекеттерін Андреев, Дмитриев және Петропавл ауылдық округтерінде ашу жоспарланып отыр.
Ш. ДОСКЕЕВА,
«Жаңа уақыт»
