Жуырда Семей қаласының іргесіндегі Шақаман ауылында ет және ет өнімдерін терең өңдейтін жаңа өндірістік кешеннің құрылысы салтанатты түрде басталды. Тек аймағымыз үшін ғана емес, байтақ еліміз үшін маңызды саналатын өнеркәсіп нысанының іргетасын қалау рәсіміне облыс әкімі Берік Уәли, «Eurasia Agro Semey» ЖШС құрылтайшылары – еліміз бойынша белді кәсіпкерлер санатындағы ағайынды Сайлау, Ерлан Мұқашевтар мен іргелі ауылшаруашылық құрылымдарының басшылары, сала ардагерлері де қатысты.
Айта кетейік, аталмыш жаңа кешен байырғы, даңқы күллі кеңес одағына жайылған Семей ет комбинатының жалғасы болмақ. Оған дәлел көп. Мәселен, аталмыш кәсіпорын толық қуатымен іске қосылған шақта бір ауысымда 35 тонна ет өнімін өңдеуге мүмкіндік береді. Мұнда ірі қара, қой және жылқы етін өңдеу арқылы сапалы шұжық, консервіленген өнімдер, жартылай фабрикаттар мен жоғары санатты ет деликатестері өндіріледі. Бұл өндіріс тері-былғары саласына қажетті шикізатты ұсыну арқылы өңірде толық өндірістік тізбекті, яғни өндірістің экожүйесін қалыптастырады.
Сонымен қатар қалдықсыз технологияларды қолдану арқылы экологиялық талаптарға толық сәйкес келеді. Мұның сыртында әлемдік деңгейдегі стандарттарға сай өнімдер өндірілмек. Себебі, алғашқы кезекте өнімдер Ресей мен Қытайға, кейінірек Иран, араб елдері тәрізді өзге де шетелдерге де экспортталатын болады. Яғни, болашаққа арналған амбициялық жобалардың ауқымы өте кең.
«Eurasia Agro Semey» жауапкершілігі шектеулі серіктестігі жүзеге асыратын, Австралия және Еуропаның заманауи технологиясымен жабдықталатын ет комбинаты жобасының құны 7,7 млрд теңгені құрайды. Жоба іске асқан шақта жалпы саны мың адам тұрақты жұмыспен қамтылатын болады.
Тағы бір ерекшелік — ет және ет өнімдерін терең өңдейтін өндірістік кешен қалдықсыз өнім өндіреді. Яғни, сойылатын малдан алынатын барлық өнім кәдеге жарайды. Қан ұны, сүйек ұны әзірленіп, аймағымыздағы құс және мал шаруашылығына пайдаланылады. Тіпті, ірі қара мен ұсақ мал терісі де алғашқы өңдеуден өткізілетін болады.
Жоба бойынша 7 мың бас ұсақ малға арналған бордақылау алаңы дайындалған. Қазір 10 мың бас ірі қараға арналған алаң салу үшін қосымша жобалау жұмыстары жүргізілуде.
Аталған жоба Абай облысын 2027 жылға дейін дамыту жоспарына енгізіліп, өңірлік және ұлттық деңгейде басымдыққа ие жоба ретінде танылып отыр. Мемлекет басшысы бұл бастаманы 2025 жылдың ақпан айында өткен жұмысшы мамандықтарының көрмесінде жеке атап өтіп, жобаның маңыздылығына назар аударған болатын. Сондай-ақ Президент Әкімшілігі тарапынан тұрақты бақылауға алынып, жобаның нақты іске асырылуына зор қолдау көрсетіліп отыр. Осынау орайда облыс әкімі Берік Уәли мұндай ауқымды инвестициялық жобаның өңір үшін маңызы аса зор екенін баса атап өтті.
-Президентіміз Қасым-Жомарт Кемелұлы Тоқаев Ауыл шаруашылығы еңбеккерлерінің бірінші форумында «Агроөнеркәсіп кешенін индустрияландыруды белсенді түрде жалғастыру қажет» деп атап өткен болатын. Бұл кешен – тек өндіріс қана емес, мал шаруашылығын жүйелі дамытудың, бордақылау алаңдарын кеңейтудің, жаңа жұмыс орындарын ашудың және елді мекендердің әлеуетін арттырудың нақты үлгісі. Қазіргі таңда өңірдегі мал шаруашылығымен айналысатын азаматтар өсірген малын, тері өнімдерін лайықты бағада өткізе алмай жүр. Бұл ауыл еңбеккерлеріне нақты көмек болмақ. Сонымен қатар Абай облысына ғана емес, көрші Шығыс Қазақстан, Павлодар, Қарағанды облыстарының шаруаларына да үлкен қолдау болады деп ойлаймын. Өндірістік кешенді кезінде шет мемлекеттерге дейін өз өнімін экспорттаған Семей ет комбинатының қайта жаңғыруы, заңды жалғасы деуге болады. Осындай нақты жобаларды іске асырудың нәтижесінде шетелдік және отандық ірі инвесторлардың аймағымызға деген қызығушылығын арттыра аламыз. Мұндай жобалар олардың облыс агроөнеркәсіп кешеніне қомақты қаржы салуына сенімді негіз болады. Бүгінгі рәсім — өндірістік дамуға басқан символдық мәні зор алғашқы қадам. Аталған жобаның халық игілігіне қызмет етіп, өңірдің дамуына серпін беретініне сеніміміз мол, — деді бұл ретте аймақ басшысы.
Өндірістік кешенді 2026 жылы тамыз айында іске қосу жоспарланып отыр. Демек, жаңа кәсіпорында даярланған шұжық пен консерві өнімдері семейліктер дастарханына қойылар уақыт та алыс емес деген сөз.
Айкөркем МАҚЫШ,
«Жаңа уақыт»
