Бородулиха ауылдық округінде дәстүрлі түрде өткізіліп келе жатқан «Үздік аула» байқауы биыл да жалғасын тапты. Бұл игі шараның басты мақсаты – ауыл тұрғындарын туған жерін көркейтуге, аулаларын көгалдандыруға және ортақ тазалықты сақтауға ынталандыру.
Байқауға округтің белсенді тұрғындары атсалысып, өздерінің ұқыпты да әдемі аулаларын көпшілік назарына ұсынды. Әр аула өзіндік ерекшелігімен көзге түсті: бірінде сан түрлі гүлдер жайқалса, енді бірінде жасыл желек пен сәндік бұталар әдемі үйлесім тапқан. Тіпті кейбір қатысушылар шығармашылық қиялын іске асырып, қолөнер бұйымдарын, шағын сәулеттік элементтерді пайдалана отырып, үйлерінің сәнін кіргізген.
Қазылар алқасы аулалардың тазалығына, көгалдандыру деңгейіне, эстетикалық безендірілуіне ерекше назар аударды. Нәтижесінде, үлгілі еңбегімен көзге түскен Наталья Алексеевна Шилко жеңімпаз атанды. Оның ауласы – үлгілі тәртіп пен әдеміліктің жарқын үлгісі. Мұнда сәндік өсімдіктердің алуан түрі өсіріліп, шығармашылықпен жасалған дизайн элементтері ерекше үйлесім тапқан.
Ауылдық округ әкімшілігі жеңімпазды құттықтап, алдағы уақытта да табыс пен шабыт, әсем ауласына көрік пен гүлдену тіледі.
— «Бұл байқау бізді тек ауланы таза ұстауға ғана емес, туған жерімізді көркейтуге, ауылымызға деген сүйіспеншілікті арттыруға үйретеді. Мұндай шаралар әр отбасының еңбегін бағалап, көршілердің бір-біріне деген ынтымағын нығайтады», – дейді ауыл тұрғындары.
Жылдан-жылға дәстүрге айналған «Үздік аула» байқауы ауылдық округ тұрғындары үшін маңызды оқиғаға айналып келеді. Ол тек ауылдың көркі мен тазалығын арттырып қана қоймай, тұрғындардың белсенділігін көтеріп, ортақ іске жұмылдырады.
Бұл бастама – ауылды абаттандыруға қосылған сүбелі үлес әрі келер ұрпаққа үлгі боларлық игі дәстүр.
Е. ТОПОРКОВА
