Ұлт анасына айналған кешегі Зере, Айғаным әжелер мен Ұлжан аналардың жолын кейінгі аяулы арулар, ибалы да инабатты келіндер жалғап келеді. Көктемнің шуақты мерекесінде асыл жар, аяулы ана, инабатты келін, сүйікті ұстаз, Жезкент мектеп-лицейінің мұғалімі Ботагөз Джакупова жайлы қалам тербеуді жөн көрдік.
1988 жылы өмірге келген Ботагөз Оралбекқызы мектеп жасынан үлгілі оқушылар қатарында болған. 2006 жылы ұстаз болсам деген асқақ арманын арқалап Семей педагогикалық институтына қазақ тілі мен әдебиеті пәнінің мұғалімі мамандығы бойынша оқуға түскен. Ұстаздық жолды таңдап, шәкірт тәрбиесіне араласқанына биыл 12 жыл болды.
Осы уақыт аралығында Жезкент кентінің балаларының мемлекеттік тілді терең меңгеруіне, ұлттық рухани құндылықтарды бойларына сіңіруге, тағылымды тәрбие беруге атсалысты. Сабақтан тыс қоғамдық жұмыстармен де шұғылдануды әдетке айналдырды. Өзі жетекшілік ететін 10 сынып мектепішілік іс-шараларға белсене қатысады. «Ұстазы жақсының ұстамы жақсы» демекші, әр түрлі байқауларда креативті идеяларымен ерекшеленетін шәкірттері шабытты шығармашыл ұстаздарынан алса керек. Мектеп президенті Назерке Қадырова да осы сыныптың оқушысы. 9 сыныптан кейін колледжге кеткен 6 оқушысының да грантқа түсуі – ұстаз мерейін арттырды.
Ботагөз Оралбекқызы оқушыларға білім берумен ғана шектелмей, «Бұлақ көрсең, көзін аш» демекші, олардың дарынын дамытып, талантын шыңдауды мақсат етеді. «Шәкіртсіз ұстаз тұл» демекші, оқушылары өңірлік байқауларда аудан абыройын асқақтатып жүр. Бұл да еселі еңбегінің жемісі болса керек. Атап айтсақ, Назерке Қадырова «Республикалық балалар оқулары» байқауынан аудандық деңгеде 1- орынға, облыстық кезеңде 3-орынға ие болса, «Махамбет оқуларының» аудандық кезеңінде жоба қорғап, 2-орынды еншіледі. Тағы бір оқушысы Ақниет Тлеуберді «Әлем таныған Әуезов әлемі» байқауының аудандық кезеңінен 1-орын, облыстық байқаудан 3-орын, пәндік олимпиададан 2-орын алды. Ал Жанель Кеңесова «Әбіш оқулары» байқауында проза, поэзия аталымы бойынша мәнерлеп оқудан 1-орын иеленіп, облысқа жолдама алды.
Өзіне де, оқушыларына да талап қоя білетін ұстаз ізденімпаз педагогтар қатарынан.
-Ұстаздық ұстанымым – адамгершілігі мол, иманды, білімді, бәсекеге қабілетті ұрпақ тәрбиелеу арқылы еліміздің дамуына үлес қосу. «45 жыл мұғалім болсаң да, 45 минутыңа дайындал!» деген сөз менің үнемі жадымда. Ұстаз ұрпақ болашағына жауапты болғандықтан, үнемі ізденіс үстінде болуы керек,- дейді кейіпкеріміз.
Ізденімпаз ұстаз үйде аяулы жар, асыл ана. Отағасы Нұржан Жұмағалиұлымен үш перзентке әлемнің жарығын сыйлап, тағылымды тәрбие беріп отыр. Қыздары Еркеназ Семей қаласындағы Назарбаев зияткерлік мектебінде білім алып жатса, Малика Жезкент мектеп-лицейінің 3 сынып оқушысы. Ұлдары Жантөре – 1 жастан асқан бөбек. Әулетінің ибалы келіні атанған Ботагөз Оралбекқызына атасы Жұмағали Мақышұлы мен енесі Қалима Әбдікәрімқызы да баталарын беріп, тілеуін тілеп отыр. Бұдан асқан бақыт бар ма?!
Әйгерім ЖАҚЫП,
«Жаңа уақыт»