Ұстаз – ұлағатты есім. Елімізде ұстаз еңбегін жоғары бағалап, «Ұстаз мәртебесі» туралы Заң қабылданды. Жыл сайын ұстаздардың әлеуметтік жағдайын көтеру мақсатында түрлі іс-шара қолға алынып келеді. «Ел болашағы жақсы ұстаздың қолында» екенін білген Президентіміз Қасым-Жомарт Тоқаев мұғалімдерді өз ісін еш нәрсеге алаңдамай атқару үшін қағазбастылықтан құтқару және көптеген қоғамдық істерден де босатуға шешім қабылдағаны бәрімізге белгілі. Сондықтан, ұлағатты ұстаздардың мәртебесін ойлап, оларға жағдай жасалып отырғанын мақтанышпен айта аламыз.
Ұстаздар қауымы үшін ең ерекше екі мереке болса, соның бірі – Ұстаздар күні. Ұстаздар күні мерекесінің аталып өту тарихына қысқаша тоқталсақ, 1994 жылдан бері мұғалімдер мен білім беру саласындағы қызметкерлердің кәсіби мерекесі дүниежүзінің 100-ден астам мемлекетінде қазан айының алғашқы жексенбісі болып белгіленген. Кей мемлекеттер бұл мерекені 5 қазан күні атап өтеді. Ұстаздар күні біздің елімізде де қазан айының алғашқы жексенбісіне белгіленген. Дәлірек айтсақ, мұғалімдер күні 1965 жылы 29 қыркүйекте КСРО жоғарғы кеңесі президумының бұйрығымен қазан айының алғашқы жексенбісіне қойылған. Сондай-ақ, 1966 жылы 5 қазанда ЮНЕСКО мен Халықаралық еңбек ұйымының өкілдері «Мұғалімдердің мәртебесіне қатысты ұсыныстар» құжатына қол қойған.
Ұстаздар күні – тек мұғалімдердің ғана емес, көпшілік жақсы көретін кәсіби мерекелердің бірі. Бұл күні ұстаздарға арналған тілектер айтылып, шоқ-шоқ гүлдер табысталады. Сондай-ақ, мектептерде концерттер ұйымдастырылып, түрлі-түсті қабырға газеттері әзірленеді.
Жақында аудандық Мәдениет үйінде мұғалімдер күні мерекесі кең көлемде аталып өтті. Ұстаздар қауымының мерейі өсіп, көңілдеріне шаттық орнаған іс-шараға тұрғындар көптеп жиналды.
Ұрпақ тәрбиелеуде өзінің уақытын аямай, шәкірттерінің бақытын аялай білген жандарға арналған салтанатты іс-шараға аудан әкімі Айдар Ибраев қатысып, мұғалімдерді төл мерекелерімен құттықтады.
– ХХІ ғасыр – ақпараттық-технологиялық мәдениеттің дәуірі. Егемен еліміздің болашағы – білімді ұрпақтың қолында десек, өркениет көшіне ілесу, оқушының бойына ұлттық құндылықтың нәрін сеуіп, тәуелсіздігі мен бірлігі мызғымайтын еліміздің айтулы азаматын қалыптастырып өсіру – ұстаздардың мәртебелі міндеті. Сондықтан ұстаздар қауымы елге елеулі, халқына қалаулы, қадірлі жандар.
Қазіргі таңда ауданымыздағы мектептерде ұстаздар шәкірттерді білім нәрімен сусындатып, тәлімді тәрбие бесігінде тербеуде. Міне, осы ұлағатты ұстаздарымыздың арқасында оқушыларымыз облыстық, республикалық білім додаларында биік тұғырлардан көрініп, ауданымыздың мерейін асқақтатуда. Сіздерді төл мерекелеріңізбен тағы да құттықтай отырып, баршаңызға бақытқа толы ғұмыр, еңбектеріңізге сәттілік, шаңырақтарыңызға шаттық тілеймін!, – деді аудан әкімі Айдар Ибраев.
Одан әрі аудан әкімі бір топ ұстазды Құрмет грамотасымен, Алғыс хатпен, бағалы сыйлықтармен марапаттады. Атап айтсақ, Абай облысының білім басқармасы мемлекеттік мекемесінің Құрмет грамотасымен Әлихан Бөкейхан атындағы қазақ орта мектебі қазақ тілі мен әдебиет пәнінің мұғалімі Б. Бекетай, Новопокровка орта мектебінің математика пәнінің мұғалімі И. Воронина, Әлихан Бөкейхан атындағы қазақ орта мектебінің география пәні мұғалімі, география пәні бойынша олимпиаданың республикалық кезеңінің жүлдегері К. Калиева, Новопокровка орта мектебінің орыс тілі мен әдебиеті пәнінің мұғалімі, «Зерде» ғылыми жоба байқауының облыстық кезеңінің ғылыми жетекшісі И. Кресс, Жезкент кенті мектеп-лицейінің тарих пәнінің мұғалімі, «Үздік авторлық бағдарлама» байқауының республикалық кезеңінің жүлдегері Г. Апенова, Н. Островский атындағы орта мектебінің биология пәні мұғалімі, «Үздік биология мұғалімі» облыстық байқауының жеңімпазы Н. Анисимова, Н. Островский атындағы орта мектебінің ағылшын пәні мұғалімі, ТМД елдерінің ғылыми және оқу орындары арасындағы «I Халықаралық кітап баспасы», «Білім беру саласының үздігі» байқауының жеңімпазы И. Ангельчева, Жезкент кенті орта мектебінің химия пәнінің мұғалімі Н. Черенкова, Жезкент кентінің мектеп-лицейінің физика пәнінің мұғалімі, республикалық «Педагогикалық жаңалықтар» байқауының аймақтық кезеңінің жүлдегері А. Бабаев, Успенка орта мектебінің информатика пәні мұғалімі, облыстық робототехника жарыстарының жетекшісі А. Понамарёв марапатталды.
Аудандық білім беру жүйесіндегі жемісті педагогикалық қызметі, өскелең ұрпаққа білім мен тәрбие беруде жоғары нәтижелерге қол жеткізгені үшін және Ұстаздар күні мерекесіне орай, аудан әкімінің Алғыс хатына Переменовка орта мектебінің директоры және математика пәнінің мұғалімі В. Балтабаева, Андроновка бастауыш мектебінің меңгерушісі, қазақ тілі мен әдебиет мұғалімі, аудандық, облыстық олимпиада жүлдегерлерін дайындағаны үшін Ж. Смағұлова, Михаличенкова орта мектебінің математика пәнінің мұғалімі, А.Байтұрсынов атындағы олимпиаданың жеңімпазы С. Горлач, Белағаш орта мектебі директорының тәрбие ісі жөніндегі орынбасары, «Өлкетану сағаты» облыстық байқауының аудандық кезеңінің жеңімпазы С. Хорун, Песчанка орта мектебінің директоры және биология пәнінің мұғалімі, А.Байтұрсынов атындағы олимпиаданың жеңімпазы С. Попов, Уба-Форпост орта мектебінің директоры, дене шынықтыру мұғалімі және «Солнечный» жазғы сауықтыру лагерінің директоры, Абай облысыныңу дарынды балаларды анықтау, дамыту және қолдаудың кешенді жоспарын іске асыру аясындағы республикалық аймақтық семинарға қатысушы Е. Джура, Ы. Алтынсарин атындағы орта мектебінің математика пәні мұғалімі, «Педагогикалық идеялар панорамасы» республикалық байқауының қатысушысы О. Собченко, «Балдәурен» балабақшасының тәрбиешісі, аудандық, облыстық, республикалық, халықаралық байқаулардың жеңімпазы Ж. Макажанова, В. Комарова атындағы орта мектебінің бастауыш сынып мұғалімі, бастауыш сынып мұғалімдерінің облыстық форумының қатысушысы Г. Матыцина, Бородулиха колледжінің математика және физика пәні мұғалімі Л. Ешимова, Бородулиха колледжінің өндірістік оқыту шебері, Е. Олжатаев ие болды.
Бұдан кейін Ұстаздар күніне арналған іс-шарада аудандық білім беру бөлімі басшысының міндетін атқарушы Айжан Абзалиқызы бірқатар мұғалімдерді аудандық білім беру бөлімінің алғыс хаттарымен марапаттады.
Мерекелік кеште мұғалімдерді аудандық Мәдениет үйінің, шығармашылық үйінің өнерпаздары құттықтап, мерекелік көңіл-күй сыйлады.
Ербол Темирбулатов